भांगरभूंय | प्रतिनिधी
तुमची भलायकी बरी उरतली. संशोधकांनी जेवणाचे सात पॅटर्न आनी काळजाच्या दुयेंसा विशीं अभ्यास केलो. तातूंत तांणी न्यूट्रीनेट समुहांत १,०३,३८९ उमेदवारांचो डेटा वापरला. जातूंत ७९ टक्के बायलांचो आसपाव आशिल्लो. तांचें आयुश्य ४२ वर्सां आशिल्लें.
संशोधकांनी विवीध समुहांतल्या लोकांच्या आंकड्यांचो आधार घेतलो तातूंत पिराय, लिंग, कुटुंबीक स्थिती आनी हेर गजालींचो विचार केलो. हातूंत पुश्टीक आहार, जिणेपद्दत आनी न्हिदे विशीं निरीक्षण केलें. निश्कर्शा प्रमाण नाश्तो करिना आनी दिसाचें जेवण उसरां घेतिल्ल्यांक काळजाच्या रोगाचो धोको सगळ्यांत चड आसता. दरेक वर उशीर म्हळ्यार धोक्यांत ६ टक्के वाड जाल्ल्याचें संशोधनांत मुखार आयलां.
हार्ट अटॅकचो धोको
जी व्यक्ती सकाळीं ९ वरांचेर नाश्तो करता तांकां काळजाचें दुयेंस जावपाची शक्यताय ८ वरांचेर नाश्तो करपाचे तुळेंत ६ टक्के चड आसता. जेन्ना रातच्या जेवणा विशीं सांगचें म्हळ्यार आठ वरांचेर जेवण करप्यांचे तुळेंत ९ वरां उपरांत जेवप्यांक सेरेब्रोवास्कुलर रोग म्हळ्यार स्ट्रोकाचा धोको २८ टक्क्यां मेरेन वाडटा. चडशें बायलां मदीं हो धोको वाडटा, अशें संशोधनांत कळ्ळां.
ग्लोबल बर्डन ऑफ डिजीज अध्ययन
दिसाचें निमाणें जेवण आनी दुसर्या दिसाचें पयलें जेवण हातूंत रातच्या उपासाचो लांबणेर वचपी काळ सेरेब्रोवास्कुलर रोगा वटेन वळटा. दिसाच्या पयल्या आनी निमाण्या जेवणाचो विचार केल्यार निमाणें जेवण बेगीन खावपाचो सल्लो दितात. ग्लोबल बर्डन ऑफ डिसीजच्या अभ्यासा प्रमाण काळजाचो रोग संवसारांतले मरण येवपाचें मुखेल कारण जावन आसा.
संवसारांत २०१९ वर्सा १८.६ दशलक्ष लोकांक काळाजाच्या दुयेंसान मरण आयलां. तांतलीं ७.९ मरणां आहाराक लागून जाल्यांत.
पयलें आनी निमाणें जेवण बेगीन घेयात
वेळार जेवण हें ह्या दुयेंसाचे उदरगतींक व्हडली भुमिका करता. पाश्चात्य समाजाच्या आधुनीक जीवनशैलीक लागून खावपाचे संवयेंत बदल जाला. जसो रातचें उसरां जेवण आनी सकाळीं नास्तो करप ना. तशेंच पयल्या आनी निमाण्या जेवणांत लांबपी उपासाक लागून व्हड परिणाम जाता. ताका लागून पयलें आनी निमाणें जेवण बेगीन खावपाचे संवयेन काळजाच्या दुयेंसाचें प्रमाण उणें जावपाक मजत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
