भांगरभूंय | प्रतिनिधी
भांगरभूंय । प्रतिनिधी
पणजीः राज्यांत फाटल्या 2021 वर्सा गुन्यांवगारींत व्हडा प्रमाणात वाड जाली. मात सान भुरग्यां वयल्या अत्याचाराच्या गुन्यांवांचें प्रमाण फाटल्या तीन वर्सांत कमी जालें. 2021 वर्सा 72 बलात्काराच्यो घडणुको घडल्यो. तातूंत 47 भुरग्यांचो आसपाव आशिल्लो.
चार गुन्यांवांत न्यायालयान गुन्यांवकारांक ख्यास्त फर्मायली. 19 प्रकरणांत दुबावितांक पुरावे मेळूंक नाशिल्ल्यान निर्दोश सोडचें पडलें. न्यायालयांत 96.1 टक्के केशी प्रलंबीत आसात अशी म्हायती राष्ट्रीय गुन्यांव रेकॉर्ड ब्युरोन (एनसीआरबी) आपल्या 2021 वर्साच्या अहवालांत दिल्या.
एनसीआरबीच्या अहवाला प्रमाण राज्यांत 2019 वर्सा 2,465 गुन्यांव नोंद जाले. जाल्यार 2020 वर्सा 3,393, 2021 वर्सा 2,099 गुन्यांवांची नोंद जाली. फाटल्या तीन वर्सांची आंकडेवारी पळयल्यार 2021 वर्सा गुन्यांवांचें प्रमाण मात्शें उणे जाल्लें दिसता. 2021 वर्सा भुरग्यांचेर केल्ल्या अत्याचाराचे 142 गुन्यांव नोंद जाले. तातूंत एका चल्याचो खून, एकल्याक आत्महत्या करपाक फोर्सार केल्ल्याचो गुन्यांव नोंद जालो. पॉस्को, सायबर आनी ज्युव्हेनायल कायद्या खाला 9 भुरग्यांचेर अत्याचार केल्ल्याचे गुन्यांव नोंद जाले.
भुरग्यांचें अपहरण केल्ल्याचे 47 गुन्यांव नोंद जाले जाल्यार भुरग्यांचेर बलात्कार केल्ल्याचो 47 गुन्यांव नोंद जाले. जल्मा उपरांत चार भुरग्यांक सोडून दिल्ल्याचे चार गुन्यांव नोंद जाले. 21 भुरग्यांचो विनयभंग केल्ल्याचे गुन्यांव नोंद जाले. 2021 वर्सा भुरग्यांच्या अत्याचाराचे 151 गुन्यांव नोंद जाले. त्या पयलींची 50 धरून 201 प्रकरणाचो पुलिसांनी तपास केलो. तातूंतल्या 105 प्रकरणात तांणी न्यायालयांत आरोपपत्र सादर केलीं. 2021 वर्सा 53 गुन्यांवाचो तपास पुलिसांनी पुराय केलो ना.
सान भुरग्यांचेर केल्ल्या अत्याचाराची 783 प्रकरणां 2021 सावन न्यायालयांत प्रलंबीत आसा. 6 प्रकरणांतल्या दुबावितांक सुनावणी सुरू आसतना मरण आयलें. 4 प्रकरणांत दोशीक ख्यास्त फर्मायली, पुरावे नाशिल्ल्यान 19 जाण निर्दोश सुटले. 853 प्रकरणा न्यायालयांत अजून प्रलंबीत आसात अशें एनसीआरबीच्या अहवालांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
