भांगरभूंय | प्रतिनिधी
भांगरभूंय I प्रतिनिधी
पणजीः हवामान विभागान उक्तायिल्ल्या अदमासा प्रमाण शेनवारा राज्यांत विवीध वाठारांनी आडवेळो पावस पडलो. सत्तरी, पेडणें, काणकोण ह्या वाठारांनी मोट्या प्रमाणांत पावस पडलो. दीसभर ढगाळ वातावरण आशिल्ले. अस्तंते कडल्यान येवपी थंड वाऱ्याक लागून वातावरणांत आर्द्रता निर्माण जावन कांय वाठारांनी पावस पडला, अशी म्हायती हवामान खात्याचे शास्त्रज्ञ डॉ. राजश्री व्हीपीएम हांणी दिली.
मजगतीं, शेनवारा पणजे कमाल तापमान 36 अंश सेल्सियस जाल्यार किमान तापमान 25 अंश सेल्सियस अाशिल्ले. मुरगांवां कमाल तापमान 32.5 जाल्यार किमात तापमान 26 अंश सेल्सियस नोंद जाल्या. आयतारा वातावरणांत चडसो बदल जावचो ना, अशेंय तांणी सांगलें.
मजगतीं, सत्तरी म्हालांतल्या जायत्या वाठारांनी दनपारां 4 वराच्या सुमाराक वादळी वाऱ्या सयत पावस पडलो. वादळी वाऱ्याक लागून वीज पुरवण खंडीत जावपाचे प्रकार घडले. विजेचे खांब मोडिल्ल्यान वीज खात्याची मोट्या प्रमाणांत लुकसाणी जाल्या. सत्तरी म्हालांतल्या वाळपय, ठाणें, नगरगांव, होंडा, खोतोडें, खडकी ह्या वाठारांत पावस पडलो.
काणकोणांय विजांच्या गडगडाटा सयत पावस पडलो. गांवडोंगरी, इंद्रावाडो हांगा मोट्या प्रमाणांत पडलो. सकाळच्यान काणकोणां दमट वातावरण अाशिल्ले. गरमीय वाडिल्लीं. ते प्रमाण सांजे पावसान हजेरी लायली.
पेडणें म्हालांतूय सांजे मोट्या प्रमाणांत पावस पडलो. वादळी वाऱ्याक लागून झाडां पडपाची तशेंच वीज पुरवण खंडीत जाल्ल्यान नागरिकांक त्रास जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
