भांगरभूंय | प्रतिनिधी
सगल्यांत चड जमीन तिसवाडींतः कृशी खात्याचे आंकडेवारींतल्यान म्हायती
भांगरभूंय I सिद्धार्थ कांबळे
पणजी : गोंयांत लागवडी योग्य वट्ट 13,256 हॅक्टर जमीन फाटल्या तीन वर्सां पसून पडीक आसा. सगल्यांत चड 3,732 हॅक्टर जमीन तिसवाडींत, जाल्यार सगल्यांत उणी 74 हॅक्टर जमीन सत्तरी म्हालांत आसा. विवीध कारणांक लागून फाटल्या जायत्या वर्सां पसून ह्यो जमनी पडीक दवरल्यात.
कृशी खात्या कडल्यान मेळिल्ले 2021-22 तल्या आंकडेवारी प्रमाण, उत्तर गोंयांत लागवडी योग्य 9,344 हॅक्टर, जाल्यार दक्षीण गोंयांत 3,912 हॅक्टर मेळून 13,256 हॅक्टर जमीन फाटल्या तीन वर्सां पसून पडीक दवरल्या. तशेंच फाटल्या पांच वर्सांत पडीक दवरिल्ल्या जमनींचोय अास्पाव आसा. उत्पन्ना परस खर्च चड आशिल्ल्यान 3,195 हॅक्टर जमीन कायमची पडीक आसा. जाल्यार 6,149 हॅक्टर जमीन फाटल्या पांच वर्सां पसून पडीक आसा. दक्षीण गोंयांतली 1,586 हॅक्टर जमीन खर्चाचे नदरेन परवडना म्हूण कायमची पडीक आसा. जाल्यार 2,326 हॅक्टर जमीन फाटल्या पांच वर्सां पसून पडीक आसा.
राज्यांतल्या सगल्या ग्रामपंचायतींनी नोंद आशिल्ले प्रमाण गोंयांत वट्ट 3,61,113 हॅक्टर जमीन आसा. तातूंत उत्तर गोंयांत 1,42,208 जाल्यार दक्षीण गोंयांत 2,18,905 हॅक्टर जमीन क्षेत्र आसा. उत्तरेंतली 31,911 हॅक्टर आनी दक्षीणेंतली 93,562 हॅक्टर जमीन मेळून 1,25,473 हॅक्टर जमीन रानक्षेत्रांत आसा, अशें कृशी खात्या कडल्यान मेळिल्ल्या आंकडेवारींतल्या स्पश्ट जाला.
मजगतीं, राज्य सरकारान स्वयंपूर्ण गोंय मोहीम राबोवन गोंयाक कृशी क्षेत्रांत स्वावलंबी करपाचो निश्चेव केल्लो आसतनाच लागवडी योग्य जमीन पडीक उरपाच्या प्रमाणांत वाड जायत आसा. पडीक जमीन लागवडी खाला हाडपाच्या हेतान सरकारी पांवड्या वयल्यान ठोस पावलां उखलपाक सुरवात केल्या. ताचोच एक भाग म्हूण पडीक जमनी ताब्यांत घेवन ती कंत्राटी पद्दतीचेर हेर शेतकारांक दिवपा विशींच्या कायद्यांत दुरुस्ती करपाचे संकेत कांय दिसां पयलीं उदका स्रोत मंत्री सुभाष शिरोडकार हांणी दिल्लें. ते उपरांत मुख्यमंत्री डॉ. प्रमोद सावंत हांणीय हे विशीं कृशी अधिकाऱ्यांची बसका घेतले उपरांत पडीक जमनी ताब्यांत घेवपाच्यो हालचाली सरकारान सुरू केल्यात.
लागवड योग्य जमीन क्षेत्रांत उणाव
2019-20 त राज्यांतल्या वट्ट जमनींतल्यान 93,827 हॅक्टर जमीन पीक लागवडी खाला योग्य नाशिल्ली. 2021-22त अशा प्रकाराच्या जमीन क्षेत्रांत 531 हॅक्टरान वाड जाल्या. अंदूं 94,358 हॅक्टर क्षेत्र लागवडी खाला अनुकूल ना.
अंदूं उत्तर गोंयांतली 36,459, जाल्यार दक्षीण गोंयांतली 57,899 हॅक्टर जमीन लागवडी खातीर योग्य ना. उत्तरेंत दिवचल म्हालांत अशा जमनींचे 10,082 हॅक्टर क्षेत्र आसा. जाल्यार दक्षीणेंत फोंडें म्हालांत 11,056 हॅक्टर जमीन क्षेत्र आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
