राज्यांत दोन अपघातांत चवगांक मरण, एकलो जखमी
भांगरभूंय | प्रतिनिधी
हडफड्यां फांतोडेर भिरांकूळ अपघात, गिरीं स्कुटर आनी ट्रकां मदीं अपघात
पणजी ः हडफडेंच्या रशियन क्लबा लागसार आयज फांतोडेर साडेतीन वरांचेर भिरांकूळ अपघात जालो. ह्या अपघातात हैदराबादचे (तेलंगणा) दोग आनी पुण्यांतल्या एका पर्यटकांक मरण आयलें. एक विदेशी पर्यटक जखमी जालां. महेश शर्मा (नाशिक), दिलीप कुमार आनी मनोजकुमार सोनी दोगूय रावपी हैदराबाद अशीं मरण आयिल्ल्यां पर्यटकांची नांवा जावन आसा. जाल्यार एथोन बिचकाव्ह (२७) हो रशियन पर्यटक जखमी जालां.
हैदराबाद आनी पुण्यांतले पांच इश्ट गोंय भोंवडेर आयिल्ले. रातच्या वेळार ते हडफडेंच्या जंक्शना वयल्या रेस्टॉरंटांत गेल्ले. थंयच्यान फांतोडेर साडेतीन वरांचेर भायर आयले आनी आपले गाडयेंत बसले. TS- 06 EZ-1816 हे गाडयेंत ड्रायव्हर आनी एक मनीस फुडल्या शीटार बसले जाल्यार तिग जाण फाटल्या शीटार बसपाक दार उगडटाले. इतल्यान फाटल्यान GA- 03Z- 8001 ह्या नंबराची गाडी वेगान आयली. हे गाडयेंत एथोन हो विदेशी पर्यटक आशिल्लो. रशियन पर्यटकाचे गाडयेन नेटाचो धपको दिलो. तातूंत तिगांक मरण आयलें. एथोन हाची गाडी कुशीक आशिल्ल्या खोल गटारात वचून उमथली. हांतूत तोय गंभीर जखमी जालो. ताचे गाडयेचो फुडलो भाग पुरायपणान मोडलो. हे घडणुके उपरांत जखमींक पयलीं म्हापशा जिल्हो हॉस्पिटलांत दाखल केले. मजगतीं, रशियन पर्यटक गंभीर जखमी जाल्ल्यान ताका जीएमसीत धाडलो.
हणजुणे पुलीस उपनिरिक्षक साहिल वारंग आनी हवालदार रुपेश शेटगांवकार हांणी हे घडणुकेचो पंचनामो केलो आनी कुडी पोस्टमार्टमा खातीर धाडल्यात.
जाल्यार दुसरें वटेन आयज सकाळीं गिरीं वाठारांतल्या नामोशी शाळे लागसार स्कुटर आनी ट्रकां मदीं जाल्ल्या अपघातांत विदेश विनोद पोळे (23, पोंडवाळ – खोरजुवें) ह्या स्कुटर चालकाक मरण आयलें.
विदेश हो पर्रा सावन ग्रीनपार्काचे वटेन जीए- 03 एजी- 1081 हे स्कुटरी वयल्यान वतालो. ताचे मुखारच्यान जीए- 03 व्ही- 0904 क्रमांकाचो ट्रक आसलो. नामोशींतले शाळे लागसारच्या जंक्शनाचेर विदेशान ट्रकाक ओव्हरटेक करपाचो यत्न केलो. तेन्ना ताचो स्कुटरी वयलो ताबो गेलो आनी तो स्कुटरी सयत रस्त्यार पडलो. आनी ट्रकाच्या टायरा सकयल चिरडलो. ताका जाग्यारुच मरण आयलें.
ह्या अपघाताची म्हायती मेळ्ळे उपरांत म्हापश्यां पुलीस स्टेशनाचे उपनिरिक्षक दिनेश मुखिया आनी हवालदार शिवाजी शेटकार हांणी घडणूक सुवातेर वचून अपघाताचो पंचनामो केलो आनी विदेशाची कुड पोस्टमार्टमा खातीर धाडली. मजगतीं, ह्या प्रकरणांत थिवीचो ट्रक चालक रघुनाथ पवार (कोल्हापूर) हाका ताब्यांत घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
