राज्यांतल्यो पडीक जमनी घेतले सरकार ताब्यांत

भांगरभूंय | प्रतिनिधी

कायदोय जावये, मंत्री सुभाष शिरोडकार हांची शेतकारांक शिटकावणी

पणजी : जमनी पडीक दवरप हो व्हड गुन्यांव. पडीक जमनी सरकार आपल्या ताब्यांत घेतलें, हे विशींचो कायदोय जावपाक शकता, अशी शिटकावणी उदका स्रोत मंत्री सुभाष शिरोडकार हांणी शेनवारा एके कार्यावळींत उलयतना दिली.
गोंयांत जायत्या वाठारांनी जमनी पडीक अासात. तांचेर शेतकार उत्पन्न घेनात. मुळांत जमनी पडीक दवरप होच गुन्यांव आसा. ताका लागून अशो जमनी सरकार आपल्या ताब्यांत घेवपाक कायदो करपाक शकता, अशें मंत्री शिरोडकार हांणी म्हणलें.
शिरोडें मतदारसंघांत कितल्यो जमनी पडीक आसात हाची म्हायती मेळोवपाक आपूण दोन हजार चौखण मिटरा मेरेन, दोन ते पांच हजार चौखण मिटर, पांच ते 10 हजार चौखण मिटर आनी 10 हजार चौखण मिटरा वयलीं अशा चार भागांत जमनींची म्हायती मेळयल्या. आपल्या मतदारसंघांत अशें सुमार 350 शेतकार आसात, जांच्यो जमनी पडीक आसात. पूण हाचे मुखार शेतकारांक जमनी पडीक दवरपाक मेळच्यो नात. तांकां त्यो लागवडी खाला हाडच्योच पडटल्यो. नाजाल्यार तांच्यो जमनी सरकाराच्या ताब्यांत वचपाक शकतात. पडीक जमनी लागवडी खाला हाडपाक आतां खर पावलां उबारचीच पडटलीं, अशें तांणी सांगलें.
राज्यांतले जायते शेतकार लागवड करपाक तयार आसात. ताका लागून फुडल्या हंगामा पसून खाजन जमनी लागवडी खाला हाडपाक स्वयंपूर्ण इश्टांनी यत्न सुरू करप गरजेचें. हे खातीर गरजेच्यो मशिनीं राज्य सरकारा कडल्यान दितले, अशी हमीय तांणी दिली.
मजगतीं, ‘आत्मनिर्भर भारत-स्वयंपूर्ण गोंय’ मोहिमेच्या फाटभुंयेर राज्यांतल्या कृशी क्षेत्राक उर्बा दिवपाक तशेंच शेतकारांचे अर्थीक स्थैर्य सादपाक उर्बा दिवपाचे सरकारान निश्चीत केलां. ताचोच भाग म्हूण राज्यांतल्यो पडीक जमनी लागवडी खाला हाडपाचेर भर दिवपाचो विचार सरकारान केला. ताका लागुनूच पडीक जमनी आपल्या ताब्यांत घेवन त्यो लागवडी खाला हाडपाक हेरांक दिवपा विशीं कायदो सरकार हाडपाची शक्यताय आसा. तशें संकेत मंत्री शिरोडकार हांणी दिले.

राज्यांतले भाटकार फक्त जमनी आपल्यो आसात, अशें हक्कान सांगतात. पूण त्यो लागवडी खाला हाडपाक मात तयार जायनात. ही परिस्थिती आतां बदलप गरजेेचें. ते खातीर सरकारान यत्न सुरू केल्यात, अशेंय मंत्री शिरोडकार हांणी नमूद केले.