राज्यांतलीं उध्वस्त देवळां परतून उबारतलेः मुख्यमंत्री

भांगरभूंय | प्रतिनिधी

नूतनीकरण केल्ल्या श्री सप्तकोटेश्वर देवळाचें लोकार्पण

भांगरभूंय । प्रतिनिधी
दिवचलः नार्वेंच्या श्री सप्तकोटेश्वर देवळाचें नूतनीकरण ही इतिहासीक घडणूक. फुडले पिळगे खातीर प्रेरणा मेळची हे खातीर सरकार विवीध उपक्रम हातांत घेता. उध्वस्त देवळां परतून उबारपाचो संकल्प केला. हो वावर फुडल्या काळांत पुराय करतले, अशी घोशणा मुख्यमंत्री डॉ. प्रमोद सावंत हांणी केली. नार्वेच्या नूतनीकरण केल्ल्या श्री सप्तकोटेश्वर देवळाच्या लोकार्पण सुवाळ्यांत मुख्यमंत्री उलयताले. ह्या वेळार तांणी शिवरायांच्या वंशजांक खाशेली परबीं दिली.
350 वर्सां उपरांत परतून एकदां नूतनीकरण करून फुडल्या 100 वर्सांचें नियोजन करून देवळाचें काम केलां. खूबशा किल्ल्यांक, तशेंच अध्यात्मीक पर्यटन आनी हेर पर्यटनाक चालना दितले. तेचवरी दिवाडी जुंव्याचेर व्हड वास्तू उबारपाचो सरकाराचो संकल्प आसा. केंद्र आनी राज्य सरकाराच्या जोड पालवान श्री सप्तकोटेश्वर देवळांत पर्यटन इतिहास तज्ञ हांच्या आदारान आनिकूय उदरगत करतले. गोंयांतल्या हिंदू धर्माच्या रक्षणा खातीर विशेश योगदान दिवपी शिवाजी महाराज हांचें व्हड योगदान आसा, अशें मुख्यमंत्री डॉ. सावंत हांणी सांगलें.
पुरातत्व खातें आनी गोंय सरकारा वतीन सुमार 8 कोटी रुपया खर्च करून देवळाचें नूतनीकरण केलां. शिवरायांची आरती, येवकार गीत आनी नांदीन कार्यावळीची सुरवात जाली. ढोल- ताशांच्या गजरांत तुतारी आनी लेझीम तशेंच परंपरीक पद्दतीन मिरवणूक काडून कार्यावळींत रंग भरलो. ह्या वेळार सरदार घराण्यांतले मानेस्त तशेंच शिवरायांच्या साम्राज्याचे वंशज हाजीर आशिल्ले. डॉ. निलेश फळदेसाय हांणी येवकार दिलो.
ह्या वेळार श्रीमंत छत्रपती शिवेंद्रसिंह राजे भोसले हांणी छत्रपतींच्या म्हान वावराचो नियाळ घेतलो. शिवाजी महाराज, संभाजी महाराज हांचो वावर असामान्य आसा. हिंदू संस्कृती मराठीची अस्मिता आनी उर्बा दिवपी सुवात आशिल्लें हें देवळाचें आयज लोकार्पण जाता. हें दैवी शक्तीच्या माध्यमांतल्यान देवळाचें नूतनीकरण जालां. 350 वर्सां आदीं असोच सुवाळो जाल्लो. आयचो सुवाळो खोस दिवपी चैतन्य निर्माण करपी आसा, अशें तांणी सांगलें.
गोंयांत इतिहासाचें काम कायम दवरपाचो वावर सुरू आसा. राजाचें काम पालन- पोशण करप. देशांत नरेंद्र मोदी आनी गोंयांत डॉ. प्रमोद सावंत बरें काम करतात, धर्माचें रक्षण करतात. देवळां ही आमची परंपरा आसा. आशिर्वाद उर्जा निर्माण करता. शिवरायान देवळां आनी संस्कृती सांबाळपाचें काम केलें, अशेंय तांणी सांगलें.
केंद्रीय मंत्री श्रीपाद नायक हांणी सांगलें, आयचो दीस भाग्याचो. नवो साज चडयिल्ल्या देवळाच्या लोकार्पण सुवाळ्याचे साक्षीदार जावपाचें भाग्य आपल्याक मेळ्ळें. छत्रपती शिवाजी महाराजांची गाथा, महती आयज 350 वर्सां उपरांत लेगीत कायम आसा. वेगवान हालचाली, गनिमी कावाच्या बळग्यार महाराजांनी खूबशा दुस्मानांक धडे शिकयले. तांचो आदर्श हे मुखार शेंकड्यांनी वर्सां कायम उरतलो, अशें मंत्री नायक हांणी सांगलें.
मंत्री सुभाष फळदेसाय हांणी सांगलें, हिंदू संस्कृतीचें, देवळाचें रक्षण शिवरायांनी केलें. श्री सप्तकोटेश्वर देवळाचें नूतनीकरण खुबूच आकर्शक पद्दतीन केलां. हे देवूळ म्हणल्यार गोंयचे संस्कृतीचो मानबिंदी आनी गोंयचे लोकदैवत थारलां, अशें तांणी सांगलें.
देवळाचें काम पुराय जाल्ले खातीर आमदार विजय सरदेसाय हांणी खोस उक्तायली. देवळा वांगडाच पर्यटक, इतिहासाचे अभ्यासक ह्या देवळांत येवचे, हे खातीर थंय पर्यटन सर्कीट जावचें, अशी मागणी तांणी केली.
मयें मतदारसंघा खातीर हें देवूळ भूशण आनी गोंयचो मानबिंदू थारलां. पर्यटनाक चालना तशेंच हेर उदरगतीक चालना दिवपाचो आमचो यत्न आसा, अशें मयेंचे आमदार प्रेमेंद्र शेट हांणी सांगलें.
गोविंद भगत आनी सिद्धी उपाध्ये हांणी सुत्रसंचालन केलें. ह्या वेळार विवीध मानेस्तांचो भोवमान केलो.
गोंयकार कदंब राजाचें कुलदैवत आनी गोंयचें राजदैवत श्री सप्तकोटेश्वर देवळाच्या लोकर्पण सुवाळ्या वेळार माचयेर केंद्रीय मंत्री श्रीपाद नायक, मंत्री सुभाष फळदेसाय, आमदार प्रेमेंद्र शेट, आमदार विजय सरदेसाय, साताराचे आमदार श्रीमंत छत्रपती शिवेंद्रसिंह राजे भोसले, देवस्थानाचे मुखेल म्हणयारे पांडुरंग बलकवडे, मंत्री निलेश काब्राल, राजू भोसले, अध्यक्ष उदय सरदेसाय, आमदार डॉ. चंद्रकांत शेट्ये, सरपंच संदेश पार्सेकार, शंकर चोडणकार, सिद्धेश नायक, उन्नती पडोलर, तुकाराम गावडे हाजीर आशिल्ले.