भांगरभूंय | प्रतिनिधी
नव्या सरपंचां कडेन संवाद सादून जाणून घेतले म्हालांतल्यो आडखळी
भांगरभूंय । प्रतिनिधी
वाळपय: गोंयचे राज्यपाल श्रीधरन पिल्लय सत्तरी म्हालांत नवे वेंचून आयिल्ल्या सगळ्या सरपंच आनी पंच वांगड्यां कडेन संवाद सादपाचे आसात. हे विशीं मंगळारा 6 सप्टेंबराक एक खाशेली कार्यावळ आयोजीत केल्या. सत्तरी म्हालांतले सगळे सरपंच राज्यपालांक आपल्या म्हालांतल्या उदरगतीच्या कामां विशीं इतिहासीक थळां विशीं म्हायती दितले.
हे विशीं चड म्हायती अशी, देशाचे व्हड फुडारी गांधीजी खूब फावटीं ‘चल या गांवांत’ असो संदेश दिताले. देशाची वळख गांवांनी लिपल्या. ताका लागून गांधीजीन ‘पयलीं गांवांची वळख करून घेवची आनी मागीर उदरगतीची येवजण घडोवन हाडची’ असो संदेश दिल्लो. राज्यपालान हो संदेश चालीक लावपाचो निर्णय घेतला. हे प्रमाण फाटल्या वर्सा सत्तरी म्हालांतल्या नगरगांव पंचायत वाठारांत आयोजीत एके खाशेले कार्यावळींत राज्यपाल पिल्लय हांणी चार पंचायतींच्या सरपंचां कडेन संवाद सादिल्लो. हांतल्यो कांय पंचायती उरल्यात. हालींच सोंपिल्ले वेंचणुकेचे फाटभूंयेर ते नव्या सरपंचां कडेन संवाद सादपाचो आसा. मंगळार, 6 सप्टेंबराक सकाळीं 11.30 वरांचेर थळावे आमदार विश्वजीत राणे हांच्या कार्यालयांत ही कार्यावळ आयोजीत केल्या.
सत्तरी म्हालांतल्या 12 पंचायतींचे सरपंच राज्यपालांक आपल्या वाठारांतली म्हत्वाचीं उदरगतीचीं कामां, इतिहासीक थळां, पर्यावरण शिक्षणीक परिस्थिती हे विशीं संवाद सादतले.
मजगतीं, सत्तरी म्हालांतल्या सगळ्या सरपंचांक हे विशींची म्हायती एकठांय करून पुस्तक स्वरूपांत तें राज्यपालांक सादर करपाचे निर्देश पंचायत खात्या वतीन केल्यात. हे विशींची तयारी बरीच नेटान सुरू आसा.
सत्तरी म्हालाचे गटविकास अधिकारी सुर्याजीराव राणे हांचे कडेन संपर्क केलो तेन्ना, पंचायत संचालनालयान जारी केल्ल्या निर्देशां प्रमाण राज्यपाल पिल्लय हांची सत्तरी म्हालांत 6 सप्टेंबराक वशेश भेट आयोजीत केल्या.सत्तरींत वट्ट बारा ग्रामपंचायती आसात. ह्या पंचायतींच्या सरपंचां मदीं केरी पंचायतीची सरपंच अध्यक्ष दीक्षा गांवस, पर्यें पंचायतीची सरपंच रती गांवकार, मोर्ले पंचायतीचे सरपंच अमित शिरोडकार, होंडा पंचायतीचे सरपंच शिवदास माडकार, पिसुर्ले पंचायतीचे सरपंच देवानंद परब, भिरोंडा पंचायतीचे सरपंच उदयसिंग राणे, माउस पंचायतीचे सरपंच सोमनाथ काळे, ठाणे पंचायतीची सरपंच सरिता गांवकार, नगरगांव पंचायतीची सरपंच संध्या खाडिलकार, सांवड्डें पंचायतीचे सरपंच उज्वला गांवकार, खोतोडा पंचायतीचे सरपंच नामदेव राणे, गुळेले पंचायतीचे सरपंच नितेश गावडे हांचो आसपाव आसा.
मजगतीं, दनपरां ऑटोमोबाईल कॉर्पोरेशन ऑफ गोवा लिमिटेड होंडा हांगच्या कंपनीच्या प्रकल्पाक भेट दितले. ह्या वेळार ते कंपनीचें उत्पादन आनी कंपनीची काम करपाची तांक हे विशीं अधिकारी आनी वेवस्थापना कडेन संवाद सादतले, अशी म्हायती उपलब्ध जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
