भांगरभूंय | प्रतिनिधी
गोंय यात्रेंतल्यान राज्यपालान जिखलीं गोंयकारांचीं मनां
पणजीः गोंयच्या इतिहासांत पयलेच खेपे राज्यपालांनी 14 म्हयने पुराय गोंयची यात्रा करून विवीध बिगर सरकारी संस्था तशेंच गंभीर दुयेंस आशिल्ल्या दुयेंतींक राजभवना वतीन 2.75 कोटी रुपयांची अर्थीक मजत केल्या. राज्यपाल पी. एस. श्रीधरन पिल्लई हांच्या पुराय गोंय यात्रेची गोंयकारांनी तुस्त केल्या.
17 सप्टेंबर 2021 दिसा सुरू केल्ली राज्याची यात्रा राज्यपाल पिल्लई हांणी 18 नोव्हेंबर 2002 दिसा पुराय केली. ह्या 14 म्हयन्यांच्या काळांत तांणी राज्यांतली 421 गांवां, 191 पंचायती, 1,500 सरपंच, पंचाच्यो भेटी, डायलेसीस दुयेंती, कॅन्सर आशिल्ल्या 1005 दुयेंतींक तशेंच 91 बिगर सरकारी संस्थांक 2.75 कोटींची अर्थीक मजत हे यात्रे वरवीं केल्या.
गोंयच्या राज्यपालपदाची सुत्रां हातांत घेतले उपरातं राजभवन सर्वसामान्य लोकां मेरेन पावोवपाचो निश्चेव राज्यपाल पिल्लई हांणी केल्लो. ते खातीर कॅन्सर सारक्या दुयेंसां आशिल्ल्या, डायलेसीसचेर आशिल्ल्या दुयेंतींक उपचारा खातीर राजभवना वतीन निधी दितले अशें तांणी जाहीर केल्ले. ते उपरांत रोखडीच तांणी पुराय गोंय यात्रेचे नियोजन करून गोंयांतल्या सगल्याच पंचायतींक भेट दिली. राज्यांतले पयलें नागरीक ह्या नात्यान तांणी गोंयांतलीं गांवां, पंचायती आनी सर्वसामान्यांचे प्रस्न, समस्या जाणून घेतल्यो.
पुराय गोंयचे यात्रेंत राज्यपाल पिल्लई हांणी राज्यांतल्या विवीध वाठारांत आशिल्ल्या मंदिरांक भेट दिली. हातूंत सांतेरी केळबाय शांतादुर्गा, कपिलेश्वरी, शांतादुर्गा, रामनाथ, दामोदर, ब्रह्मदेव, गणेश, मल्लिकार्जुन, देवकीकृष्ण, देवी भगवती, नवदुर्गा, कामाक्षी, महालसा, विठ्ठल, महादेव, वेताळ महारुद्र, राष्ट्रोळी, लईराई, सप्तकोटेश्वर, रुद्रेश्वर, चंद्रेश्वर, मंगेश, आयाप्पा, जैन ही मंदिरां तशेंच पर्तगाळ, दत्त पद्मनाभ, श्री क्षेत्र तपोभूमी, सद्गुरु पारवडेश्वर महाराज ह्या मठांकूय भेटी दिल्याे. ते भायर राज्यांतल्यो चर्ची, मशिदी, गुरूद्वार हांकांय भेट दिवन दर्शन घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
