भांगरभूंय | प्रतिनिधी
भांगरभूंय । बातमीदार
कोरगांव : गोंय क्रांती दिसा निमतान उद्देजक तशेंच सामाजीक कार्यकर्ते राजेश दाभोळकार हांणी शासकीय माध्यमीक विद्यालय हनखणे, पेडणें ह्या शाळेच्या सगळ्या विद्यार्थ्यांक फुकट पुस्तकां वाटलीं.
हे कार्यावळीक माचयेर पत्रकार तशेंच साहित्यीक संगम भोंसले, नरेश शिरोडकार, शाळा वेवस्थापन समितीची अध्यक्ष श्यामल सावंत, मुख्याध्यापक नरेंद्र नायक हाजीर आशिल्ले.
ह्या वेळार संगम भोसले हांणी क्रांती दिसाचीं परबीं भेटोवन विद्यालयाची तोखणाय केली.
ह्या वेळार शाळा वेवस्थापन समितीचे सगळे वांगडी, पालक हाजीर आशिल्ले.
विद्यालयाची पर्जळीत येसाची परंपरा तिगून दवरपा खातीर शिक्षकांच्या यत्नांक पालकांचेंय सहकार्य मेळपाक जाय, अशें आवाहन मुख्याध्यापक नरेंद्र नायक हांणी केलें.
फाटल्या वर्सांच्या धावेच्या शिक्षणीक निकालाचो आढावो शिक्षक राजन केसरकार हांणी घेतलो. जेश्ठ शिक्षक सत्यवान केणी हांणी फाटले बसकेचें इतिवृत्त सादर केलें. शारिरीक शिक्षक बाबू नायक हांणी विद्यालयाच्या खेळां मळाचेर जाल्ले उदरगतीचो आढावो घेवन विद्यार्थ्यांनी पाळो दिवपाचे शिस्ती विशीं मार्गदर्शन केलें. सत्यवान केमी हांणी सोयर्यांक येवकार दिलो. मुख्याध्यापक नरेंद्र नायक हांचे हस्तुकीं सोयर्यांक यादस्तीक भेटयलें. मानेस्तांची वळख आनी सुत्रसंचालन शिक्षक रामा बिचोलकार हांणी केलें.
सुरवातेक मुख्यमंत्री प्रमोद सावंत हांचे करियर मार्गदर्शन कार्यावळीचो भुरग्यांनी लाव घेतलो. हे खातीर संगणक शिक्षक राजकुमार देसाय हांणी सहकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
