भांगरभूंय | प्रतिनिधी
काँग्रेसच्या 82 आमदारांचो विधानसभा अध्यक्षां कडेन राजिनामो
खबरां संस्था
राजस्थानः राजस्थानांत सध्या राजकी सत्तासंघर्श सुरू आसा. राजस्थानचे मुख्यमंत्री अशोक गेहलोत हांकां समर्थन दिवपी 82 आमदारांनी विधानसभा अध्यक्षां कडेन एकत्रीत राजिनामो सादर केला. हे सगले आमदार अशोक गेहलोत हांच्या अधिकृत घरा कडेन एकठांय जाल्ले, अशी म्हायती गोपांनी दिली.अशोक गेहलोत हे काँग्रेस अध्यक्षपदाचे वेंचणुकेंत देंवल्यात. ‘एक व्यक्ती, एक पद’ ह्या नेमाक लागून तांकां मुख्यमंत्रीपद सोडचें पडटलें. ताका लागून विधिमंडळ गटाचो नवो फुडारी वेंचपाक आयतारा रातीं आमदारांची बसका जाली. पक्षाचे प्रभारी अजय माकन आनी पक्ष निरिक्षक मल्लिकार्जून खरगेय बसकेक हाजीर आशिल्ले. तशेंच आदले उपमुख्यमंत्री सचीन पायलट लेगीत बसकेक हाजीर आशिल्ले. हे बसकेंत फक्त फुडारी निवडीचे अधिकार केंद्रीय नेतृत्वा कडेन दिवपाची औपचारिकता जातली, अशें गेहलोत हांणी स्वता जाहीर केल्ले. पूण बसके पयलींच गेहलोत समर्थक आमदारांनी राजिनामाे दिवपाचो निर्णय घेतिल्लो.
2020त सचीन पायलट हांणी पक्षांतर्गत बंड केल्लें. ह्या काळांत सरकाराक तेंको दिवपी उमेदवारच राजस्थानचो फुडलो मुख्यमंत्री आसचो, अशी मागणी ह्या आमदारांनी केल्या.
थारले, शशी थरूर काँग्रेस अध्यक्षपदाचे वेंचणुकेंत
शशी थरूरांचे थारले, काँग्रेस अध्यक्षपदाची वेंचणूक लडयतले. जायत्या जाणांचो तेंको आशिल्ल्याचो दावोय तांणी केला. राजस्थानचे मुख्यमंत्री अशोक गेहलोत हे लेगीत अध्यक्षपदाचे सर्तींत देंवल्यात. ताका लागून तांकां मुख्यमंत्रीपद सोडचें पडटलें. ते खातीर राजस्थानांत सत्तासंघर्श सुरू आसतना काँग्रेस खासदार शशी थरूर हांणी आपूण अध्यक्षपदाची वेंचणूक लडयतले, अशें जाहीर केला.
गुलाम नबी आझाद काडटले नवो पक्ष
काँग्रेसीच्या सगल्या पदांचो राजिनामो दिले उपरांत ज्येश्ठ फुडारी गुलाम नबी आझाद हांणी नव्या पक्षाच्या स्थापणुकेची घोशणा केल्या. ‘डेमोक्रेटीक आझाद पार्टी’ अशें ह्या नव्या पक्षाचें नांव आसा. तीन रंगांच्या धर्मनिरपेक्ष बावट्याचेय आझाद हांणी अनावरण केले. बेगिनूच नव्या पक्षाची स्थापणूक करतले, अशें तांणी जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
