भांगरभूंय | प्रतिनिधी
नवी दिल्ली, खबरां संस्था ः राजस्थानांत पयलेच खेपे स्वदेशी तंत्रगिन्यानाचो उपेग करून विकसीत केल्ली कॅन्सराची लस तयार करतात. ही लस फकत 10 हजार रुपयांत कॅन्सराचेर उपचार करपाक शकता. जयपुरांतल्या महात्मा गांधी वैजकी म्हाविद्यालयाक ‘डेंड्रिटिक सेल’ लस तयार करपाची परवानगी मेळ्ळ्या. हे लसीक लागून 5 प्रकारच्या कॅन्सराचेर उपचार करप शक्य जातलें. ही देशांतली पयली स्वदेशी कॅन्सराची लस आसा असो दावो केला.
लसीचेर संशोधन करपी महात्मा गांधी युनिव्हर्सिटी ऑफ मेडिकल सायन्सेस अँड टेक्नॉलॉजी, जयपूराच्या सेंटर फॉर कॅन्सर इम्युनोथेरपीचे संचालक डॉ. अनिल सुरी हांचे कडेन हें विशीं खाशेली चर्चा केल्या. 27 वर्सां संशोधन केले उपरांत तें ही लस तयार करपा खातीर तंत्रगिन्यान मेरेन पावल्यात अशें तांणी सांगलें.
डॉ. अनिल सुरी हांणी सागलें, डेंड्रिटिक सेल लस ही प्रतिकारशक्तीचेर आदारिल्ली कॅन्सराची लस आसून ती कुडीच्या रोगप्रतिकार शक्तीक कॅन्सर पेशी वळखुपाक आनी नश्ट करपाक मजत करता. ही लस वैयक्तीक रितीन तयार करतात म्हळ्यार ही लस दरेका दुयेंतीच्या कॅन्सराच्या प्रकारा प्रमाण तयार जातली. कॅन्सराचेर म्हारग उपचारां परस हो सवाय पर्याय जावंक शकता.
आतां मेरेन 5 प्रकारच्या कॅन्सराचेर संशोधन जालां. कॅन्सर पेशींचीं प्रथिनां वळखुप, तोंडाचो कॅन्सर, स्तनाचो कॅन्सर, गर्भाशयाचो कॅन्सर, पित्ताशयाचो कॅन्सर ह्या सगळ्या आड ही लस प्रभावी थारूंक शकता अशें डॉ. अनिल सूरी हांणी सांगलें.
डेंड्रिटिक सेल लस दिवपाचें येसस्वी प्रमाण दुयेंतीचे स्थितीचेर आदारून आसता. आतां मेरेन केल्ल्या 90% चांचण्यांचे निकाल पॉझिटिव्ह आयल्यात. सध्या मनशाचेर चांचणी करपाची लस तयार करपाक मान्यताय मेळ्ळ्या. हें काम सुमार 2.5 वर्सांनी पुराय जातलें. मेक इन इंडिया उपक्रमांतल्यान ही लस तयार करतात. महात्मा गांधी वैजकी विद्यापिठांत 2020 वर्सा सावन तयार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
