भांगरभूंय | प्रतिनिधी
मात गोंयची सगळ्या वाठारांत नेटान उदरगत : लुईझीन फालेरोपणजी : गोंयच्या राजकारणाचो दर्जो देंवत आसलो तरी राज्याची सगळ्या वाठारांत नेटान उदरगत सुरू आसा. नोकऱ्यो तशेंच वेवसाया निमतान बरेच गोंयकार गोंय सोडून वचपाक लागल्या. उच्च शिक्षीत आनी गिरेस्त गोंयकारांनी गोंय सोडप ही हुस्क्याची गजाल आसा, अशें आदले मुख्यमंत्री लुईझीन फालेरो हांणी म्हणला. पणजेत डॉ. फ्रेडी फर्नांडीस हांच्या कॅबीनेट गव्हर्मेंट पुस्तकाच्या प्रकाशन सुवाळ्यांत मुखेल सोयरे म्हूण ते उलयताले.
डॉ. फ्रेडी फर्नांडीस हांच्या कॅबीनेट गव्हर्नमेंट पुस्तकात गोंय मुक्ती उपरांतच्यो वेंचणुको, सरकारां, मुख्यमंत्री, मंत्रीमंडळां हाची म्हायती आसा. मुक्ती उपरांतचो राजकी इतिहास ह्या पुस्तकात आसा. पुस्तक प्रकाशनाच्या कार्यावळीक लेखक डॉ. फ्रेडी फर्नांडीस हांचे सयत मुखेल सोयरे लुईझीन फालेरो, आमदार अॅड. कार्लुस फेरेरा, पत्रकार अलेक्झांडर मोनीज बार्बोजा आनी सतद्रु ओझा हाजीर आशिल्ले.
देशाच्या हेर राज्यां परस गोंय उदरगतीन बरेच फुडें आसा. भारताच्या नक्शार गोंय हो परर्जळपी एक मोती आसा. गोंयची दरडोय येणावळ सगळ्यांत चड आसा. मरणाचें प्रमाण उणें आसा. साक्षरतायेचें प्रमाण सगळ्यांत चड आसा. सामाजीक उदरगत, शिक्षण, मुळाव्यो सुविधा हातूंत गोंय बरेच फुडें आसा. राजकारणाचो दर्जो देंवत आसलो आनी खंयचेच सरकार आसले आनी कोणूय मुख्यमंत्री आसलो तरी गोंयच्या उदरगतीचेर ताचो परिणाम जावंक ना. उदरगत नेटान जायत आसली तरी गोंयकार सुखी आसा, अशें म्हणपाक जावचें ना. दायज, इतिहास, संस्कृती, सैम राखपा खातीर गोंयकार झगडटात. हालीच्या काळात आंदोलनाचें प्रमाण वाडत आसा. तशेंच नोकरे खातीर बऱ्याच गोंयकारांचेर आयज गोंय सोडपाची वेळ येता. ही गजाल हुस्क्याची आसा, अशें लुईझीन फालेरो हांणी म्हणलें.
हे पुस्तक म्हणल्यार गोंयचो इतिहास आसा. विद्यार्थी, पत्रकार,अभ्यासक हांकां हे पुस्तक लावकारी थारतलें, अशें आमदार कार्लुस फेरेरा हांणी सांगलें. अलेक्झांडर मोनीज बार्बोजा आनी सतद्रु ओझा हांची ह्या वेळार उलोवपां जाली.
उच्चभ्रू समाजाच्या भिरांतीक लागून भोवजन
समाजा कडल्यान विलीनीकरणा वटेन मतदान
ब्राम्हण तशेंच उच्चभ्रू समाजाच्या भिरांतीक लागून जनमत कौला वेळार भोवजन समाजान विलीनीकरणा वटेन मतदान केले. भऊसायब बांदोडकार हो भोवजन समाजाचो फुडारी आसलो. हाका लागून महाराष्ट्रवादी गोमंतक पक्षाक मुक्ती उपरांत सत्ता मेळ्ळी, अशें डॉ. फ्रेडी फर्नांडीस हांणी मनोगत उक्तायतना सांगलें. पयले मुख्यमंत्री सर्गेस्त भाऊसायब बांदोडकार हाचें शिक्षण उणे आसले, मात तांचे कडेन द्रश्टेपण आसले. भाऊसायब बांदोडकारा उपरांत नेतृत्वाची धार उणी जायत गेली. धर्म आसूं वा वैचारीकता आसूं, गोंयकारांक अतिरेकी भूमिका मानवना, हे बरेच खेपे सिद्ध जालां. राजकारणांत बदनाम करपी विक्रम गोंयांत जाल्या. सगळ्यांत पयलो अपात्र मुख्यमंत्री गोंयांत जालो. राज्यपाल बडतर्फ जावपाची गजाल गोंयांत जाली. पांच वर्सांच्या कार्यकाळांत 9 सरकारां गोंयांत जाली. पक्षांतरांत विक्रम केल्ल्या गोंयांत आयज लेगीत पक्षांतरां सुरूच आसा. ह्या सगळ्या गजालींचो उल्लेख आनी संदर्भ पुस्तकांत आसा, अशें डॉ. फ्रेडी फर्नांडीस हांणी सांगलें.
ज्योवितो लॉपीस हांणी कार्यावळीचे सुत्रनिवेदन केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
