भांगरभूंय | प्रतिनिधी
गोंयकारांक नाट्यपिशें अशें म्हणटात. गोंयांत जावपी नाटकां ही ताची जिती जिवी गवाय. गोंयची खरी वळख कोंकणी रंगमाचयेंतल्यान पुराय संवसाराक करून दिवपी नाटककार म्हणल्यार पुंडलीक नारायण नायक. ह्याच नाटककाराच्या वावरांतल्यान स्फूर्त घेवन आयज जायते बरोवपी कोंकणी नाट्य संहिता आकाराक हाडटना दिश्टी पडटात. तातूंतलेच एक नाटककार म्हणल्यार महेश चंद्रकांत नायक. तांची आज मेरेन अॅक्शन, आत्मो, ओन्ली फॉर यू, ऑल इज वेल अशीं कितलीशींच नाटकां उजवाडाक आयल्यांत. नाटकां वांगडाच तांणी एकांकी, नाटकुलीं, एकपात्री, कथा अशें साहित्य प्रकार हाताळ्ळ्यात. विनोद सगल्यांक जमता असो ना, तांतले तातूंत
नाटकांत विनोद सादर करप ही एक कला. आनी ही कला तांकां बेस बरी जमल्या अशें म्हणल्यार अतिताय जावची ना.
‘आतां करपाचें कितें?’ हें तांचें नाटक. ह्या नाटकाचो पयलो प्रयोग सुयोग कला मंच, करमळी हे संस्थेन माहीम- मुंबय चवथी कडेन भौशीक गणेशोत्सवाच्या माटवांत 19 सप्टेंबर 2018 ह्या दिसा केल्लो. ह्या नाटकान कला अकादमी पणजी, राजीव कला मंदीर फोंडें तशेंच गोंयच्या विंगड विंगड वाठारांनी प्रयोग करून प्रयोगाची शंबरी गांठली. ह्या नाटकाचे प्रयोग महाराष्ट्रांत लेगीत जाल्यात. हें नाटक पुस्तक रुपान सप्टेंबर 2021 ह्या वर्सा अक्षरब्रह्म प्रकाशना वतीन उजवाडाक आयिल्लें.
हें विनोदी, रहस्यमय आनी भंयपट अशें नाटक जें एके सत्य घडणुकेचेर आदारीत आसा. नाटकाचे सुरवेक घरांत लग्नाचें वातावरण आसा. बाबाच्या घरांत नवी सून आयल्या म्हणून बाबा उमेदीन आसा. शुभमाच्या लग्नाची पयली रात. तो कुडींत वता आनी भिवन थतर-वितर जावन भायर येता. नवी व्हंकल शशिकला दोळे मोटे करून, मानेर केंस सोडून, दांत ओंठ खायत भायर येता. तें बंगाली उलयता, आपूण मोनजोलिका म्हणटा आनी कथ्थक नाचता. तिका पळोवन बाबा आनी शुभम भियेतात. शशिकला केन्ना आपल्या मेल्ल्या भावा कडेन उलयता तर केन्ना तिच्या आंगांत ललिता येता जाल्यार केन्ना बाबालो मेल्लो बापूय आपो येता. हें सगलें कांय खीण घडटा आनी उपरांत तें भूत शशिकलेंतल्या आंगांतल्यान वता. अश्यो जायत्यो घडणुको ह्या नाटकांत घडटात. ह्यो घडणुको नाटक वाचतल्याक वा नाटक पळयतल्याक हांसयताय आनी तेच बरोबर रहस्यमय वातावरण तयार करून आपल्या जाळ्यांत अडकून दवरता. सत्य केन्ना चड तेंप लिपून उरना अशें म्हणटात
तशेंच नाटकाच्या शेवटाक बाबा आनी बाबाचो इश्ट मधू दोगांय मेळून शशिकलाच्या नाटकाचें सत्य उगड्यार हाडटात आनी शशिकलाक आपली चूक कळटा.
नाटकांतले संवाद नाटकाक जितें करतात. आतां करपाचें कितें? ह्या नाटकांतले संवाद सभावीक, सुटसुटीत आसात. विनोदी शैली नाटकाच्या दर एका प्रसंगांत दिसता. प्रसंगांतली नाट्यत्मकताय जळीं थळीं आसा. दर एका प्रसंगाचेर विनोदी शैलींत भाश्य केलां. लेखक विनोदवीर आशिल्ल्यान शाब्दीक विनोद हो ह्या नाटकाचो अंगभूत गूण म्हणूंक जाय. ह्या नाटकाच्या पात्रांचीं नांवां लेगीत आशय समृद्ध करपी आनी विनोदी शैलींतल्यान भाश्य करपी अशीं आसात. देखीक: बाबा, मधू, शुभम, शशिकला अशीं पात्रां. नाटकांतलीं उपकथानकां आनी गांवच्या चाली-रितींचो केल्लो वापर संहितेची गिरेस्तकाय आनीक वाडयता. नाटकाची एक म्हत्वाचें खाशेलेपण म्हणल्यार लेखकान केल्लो शेवट.
शेवट बरो जालो जाल्यार प्रेक्षक उमेदी जातात.
शुभमाचो शशिकलाचेर केल्लो मोगूच तिचे दोळे उकते करता आनी तें आपल्या संवसाराची सुरवात खोशयेन करता. हें नाटक प्रेक्षकांचें मनोरंजन करपाक
यशस्वी थारलां हातूंत दुबाव ना.
नाटक मोग्यांनी आतां करपाचें कितें? हें नाटक मुजरत वाच्चें आनी प्रयोग
पळोवंक मेळ्ळ्यार ताचोय पुरेपूर आस्वाद घेवचो.
आतां करपाचें कितें?
लेखक – महेश चंद्रकांत नायक
प्रकाशक – अक्षरब्रह्म प्रकाशन
पानां – 80, मोल – 120 रुपया
सुरभी वस्त
9823510245
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
