भांगरभूंय | प्रतिनिधी
नमस्कार,
हांव आधुनीक काळार तुमकां सगळ्यांक चड दिश्टी पडटलों. म्हजेर सगल्या संवसाराचो भार आसा. पूण एक मात, म्हाका कोणाचो राग आयल्यार लेगीत थोड्याच वेळान हांव तो राग विसरून म्हज्या कामाक लागता. तो मनांत घेवन बसल्यार आनी जर म्हाका राग येवन हांव बंद पडलो जाल्यार सगळ्यांचीं कामां आडखून उरतलीं. म्हजेर कितल्याशाच लोकांच्या जिवनाची काणी चलता आनी ताच्या वांगडा निमणीय घडी आसता.
मनशा, वळखलो म्हाका? हांव तुमच्या पांया पोंदचो रस्तो. म्हाका तुमचो खूब मोग. तुमकां मात म्हजे पडिल्ले ना. हांव तुमच्या खातीर खूब वावुरतां, वायट म्हणिल्ले सोंशीकतायेन आयकतां. म्हाका इतलें दुख्ख जाल्यार लेगीत, तुमकां जाय तेन्नाच तुमकां म्हजी पर्वा आसता, ना तर म्हजें कोणाक पडिल्लें नासता. म्हजी कसलीच चूक नासतनाय तुमी म्हाकाच दोश दितात. म्हाका तयार करप्यांच्या नांवान बोवाळ घालतात. तें बरें आसा. पूण तांचे वांगडा म्हाकाय कित्याक म्हणून खेपतात? अशें म्हाका-तुमकां वा तुमकां-म्हाका दोश दिवंक उपकरना. सांबाळ करपाची जबाबदारी ही दर एकल्याची आसता.
आपणें स्वता सगळे सांबाळपाक जाय तशेंच चूक जाल्यार माफ करपाची जबाबदारी म्हाकाच दिवंक ना. जर एकल्या कडेन चूक जाता जाल्यार आमी ताका माफी दिवपाची गरज आसता. पूण प्रत्येक फावट ही जबाबदारी म्हाकाच दिवंक ना. तुमचीय ही जबाबदारी समजून ताचें पालन करपाची गरज आसा. हांव तुमची जबाबदारी आनी तुमचो भार घेवपाचो थांबल्यार, हातूंत म्हजें लुकसाण जावचें ना. उरफाटें तुमचेंच खूब जातलें. ह्या खातीर हांव सदांच सोंशीक आसतलों अशें समजूं नाकात, कारण म्हाकाय भावना आसात, म्हज्याय काळजाक दुख्ख जाता. ह्या खातीर तुमी म्हाका तुमचे वागणुकेंतल्यान आनी उतरांतल्यान हिणसायतात, तें हांव सोंशीकतायेचें आसल्यार तितल्या पुरतेच सोंसतलो. एक म्हणणी आसा, जर तर उदक माथ्या वयर पावलें जाल्यार तें थांबोवंक जायना. तशेंच सोंशीक आसल्यार हांव सोंसतलों, ना जाल्यार म्हज्यान तें घडचें ना. तशेंच म्हज्या सोंसणुकायेचो आनी पाशिंयेंसाचो दुरुपेग तुमी केल्लो म्हज्यान पळोवंक जावचो ना.
जसो खूब पावस पडटा तेन्ना उदक वचपाक वाट ना जाल्यार तें म्हज्या भितर रिगना, तशेंच भरून उरता. तेच तरेन केन्ना-केन्नाय तुमी मनीस सदांच म्हाका वायट म्हणटात वा वायट तरेन वागपाचें सोडनात तेन्ना तांची गत ह्या भरिल्ल्या उदकां भशेन जाता. जे तरेन भरून उरिल्लें उदक म्हजेर आसता, ताचे वयल्यान कसलेंय वाहन गेल्यार तें वयर उसळटा आनी आमचेर पडल्यार आमकां राग येता, पूण केन्ना-केन्नाय हे चुकीन घडटा वा थोडे मुद्दाम जावन करतात. तेच तरेन अशें वागपी मनीस कोणाक आवडनात जशें तें भरिल्लें उदक.
आमचे जिणेंत आमी सदांच वायट करतातूच अशें ना, पूण वायट केल्ल्याचो पश्चाताप करून बरें करूंक वावुरपाचो प्रयत्न करपाक जाय. वायट केल्यार वा घडल्यार तें मानून घेवन आपणें चूक केला जाल्यार मानपाक जाय आनी माफी मागूंक जाय. अशें केल्यार आमच्या जिवितांत शांती खेळटली, जाची मनीस जातीक आधुनीक काळार खूब गरज आसा. जशें तुमच्या वाहनाचें आनी तुमचें वजें म्हज्या माथ्यार आसल्यार सुद्धा, म्हजी दशा बिगडल्यार लेगीत हांव तुमचो सांगात सोडिना, तसोच धीर धरून रावपाचो प्रयत्न करता. ताचेर फोंडकुलां पडूं वा व्हडलें फोंड हांव आसां तसोच धीट रावपाचो यत्न करता. तेच तरेन तुमचीं नातीं खूब नाजूक आसतात. तीं सांबाळूंक तुमी सदांच ल्हानवीक जावन प्रयत्न करपाक जाय. तुमी प्रयत्न करपाचो सोडूंक जायना अशें केल्यारूच तुमी तुमच्या जिविताचीं फुडलीं पावलां, म्हजे भशेन कितलेंय वायट आयल्यार सुद्धा हांसून आनी उमेदीन चलूंक पावतलीं. जर तुमचीं मनां-काळजां सोंशीकतायेचीं आनी भगसण्यांचीं आसल्यारच तुमचीं नातीं फुलूंक पावतलीं.
तुमचो मोगाचो,
रस्तो
रीमी वाझ
7030371091
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
