भांगरभूंय | प्रतिनिधी
मशिनां आयले उपरांत 2500 फोंडकुलां पुरयलीं
पणजी : ऑगस्ट म्हयन्यांत पावसाचें प्रमाण उणे आसलें तरी रस्त्या वेलीं सगलीं फोंडकुलां पुरोवपाक भौशीक बांदकाम खात्याक येस येवंक ना. अजून मेरेन रस्त्यांचेर 6 हजार फोंडकुलां आसात. आतां मेरेन 2500 फोंडकुलां पुरोवपाक येस आयलां. भौशीक बांदकाम मंत्री निलेश काब्राल हांणी ही म्हायती दिली.
जूनांत आनी जुलयांत घोग्यांनी पावस पडलो. हाका लागून रस्त्यांचेर फोंडकुलां पडलीं. पावसाक लागून हीं फोंडकुलां पुरोवपाक शक्य जालें ना. भौशीक बांदकाम खात्यान फोंडकुलां पुरोवपा खातीर जेट पॅचर मशिनां हाडलीं. उत्तर गोंयांत दोन आनी दक्षीण गोंयांत दोन अशीं चार मशिनां गोंयांत आसात. कंत्राटदारा वतीन फोंडकुलां पुरोवपाचो वावर सुरू आसा. आतां मेरेन 2500 फोंडुकलां पुरोवपाक येस आयलां. अजून 6 हजार फोंडकुलां रस्त्यांचेर आसात. सप्टेंबर सोंप मेरेन हीं फोंडकुलां पुरोवपाचे यत्न आसात. फुडल्या पावसांत फोंडकुलां खूब तेप उरचीं नात. फोंडकुलां जाता तितले बेगीन पुरयतले अशें मंत्री निलेश काब्राल हांणी सांगलें.
रस्त्यांचेर फोंडकुलां पडपाची तरेकवार कारणां आसात. ह्या कारणांचो अभ्यास सुरू आसा. घोग्यांनी पडपी पावस हें एक कारण आसा. ते भायर तांत्रीक दोश सुदारपाची गरज आसा, अशें तांणी सांगलें.
काब्राल आयज परिशदे खातीर बंगळुरूंत
रस्ते जोडणे विशी बंगळुरूंत आयज सावन परिशद सुरू जातली. हे परिशदेंत वांटो घेवपा खातीर भौशीक बांदकाम खात्याचे मंत्री निलेश काब्राल हे आयज बंगळुरूंत वतले. केंद्रीय रस्ते आनी म्हामार्ग मंत्री नितीन गडकरी हांची ते भेट घेतले. हे भेटींत तरेकवार विशयांचेर चर्चा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
