भांगरभूंय | प्रतिनिधी
डॉ. प्रमोद सावंतः नागरिकांच्या सुचोवण्यांचेर 15 दिसांत अहवाल
पणजी : रस्तो सुरक्षा आनी वेवस्थापनाचेर नागरिकांनी केल्ल्या सुचोवण्यांचो अहवाल 15 दिसांत करून 1 डिसेंबरा सावन कांय प्रमाणांत ताची कारवाय जातली अशें मुख्यमंत्री डॉ. प्रमोद सावंत हांणी सांगलें. पन्नास टक्क्यां परस चड अपघात हे आपअपघात आसतात अशेंय तांणी सांगलें.
पणजे मिनेझीस ब्रागांझा सभाघरांत रस्तो सुरक्षा विशयाचेर आयोजीत ओपन फोरमांत मुख्यमंत्री उलयताले. ह्या वेळार भौशीक बांदकाम खात्याचे मंत्री निलेश काब्राल, येरादारी मंत्री मॉवीन गुदिन्हो, पुलीस म्हासंचालक जसपाल सिंग, खात्यांचे अधिकारी आनी नागरीक हाजीर आशिल्ले. राज्यांत अपघातांत मरण येवप्यांचो आंकडो वाडत आसा. अपघातांचेर नियंत्रण दवरपा खातीर रस्तो सुरक्षा वेवस्थापन आराखडो तयार करपाचो सरकाराचो बेत आसा. आराखड्या खातीर एनजीओ तशेंच नागरिकांच्यो सुचोवण्यो सरकारान जाणून घेतल्यो. हाचे खातीर शुक्रारा ओपन फोरम जालो.
अपघातांची तरेकवार कारणां आसात. सोरो पियेवन गाडयो चलोवपा आड पुलिसांनी कारवायेची मोहीम सुरू केली. हाका लागून आतां सोरो पियेवन गाडयो चलोवपाचे प्रमाण खूबशें उणें जालां. रस्तो सुरक्षे विशीं शिक्षण संस्थांनी लेगीत समुपदेशन सुरू जाल्ल्याचें मुख्यमंत्र्यांनी सांगलें.
अपघातांचो वाडटो आंकडो हुस्क्याचें कारण थारता. अपघातांचेर नियंत्रण दवरपा विशीं सरकार गंभिरतायेन विचार करता. नागरिकांच्यो सुचोवण्यो जाणून घेवन ते विशींचो अहवाल तयार करतले. ह्या अहवालाची डिसेंबरा सावन शक्य तितली कारवाय सुरू जातली. अपघातांचेर नियंत्रण दवरपा खातीर तात्पुरत्यो आनी दीर्घकालीन उपाय येवजण्यांची आंखणी जातली. येरादरी खातें, पुलीस आनी भौशीक बांदकाम खातें जोडपणान आराखडो तयार करतले.
चडशे अपघात बळी चालकांचे चुकी खातीर
2017 वर्सा 333 जाणांक अपघातांत मरण आयिल्लें. हातूंतले 132 बळी चालकांचे चुकी खातीर जाले. 2018 वर्सा 262 मदले 112 बळी चालकांचे चुकी खातीर जाले. 2019 वर्सा चालकांचे चुकी खातीर 133, 2020 वर्सा 111 जाल्यार 2021 वर्सा चालकांचे चुकी खातीर 135 बळी गेल्यात. मुख्यमंत्री डॉ. प्रमोद सावंत हांणी ही आंकडेवारी दिली.
सोरो पियेवन गाडी चलोवपाचे
प्रमाण 70 टक्क्यांनी देंवलां
पर्यटक तशेंच थळावे लोक लेगीत पयलीं सोरो पियेवन गाडी चलयताले. येरादारी पुलिसांनी पियेवन गाडी चलोवपा आड कारवाय सुरू केली. हाका लागून पियेवन गाडी चलोपाचें प्रमाण 60 ते 70 टक्क्यांनी देंवलां. गाडी चलयतना नेमांक पाळो दिवप गरजेचें आसा. ह्या ओपन फोरमाक बरो प्रतिसाद मेळ्ळा. हेर विशयांचेर लेगीत अशे तरेचे ओपन फोरम घडोवन हाडपाचो विचार आसा. बऱ्याच प्रस्नांचेर एनजीओ न्यायालयांत वता. सगल्यांक विस्वासांत घेवन धोरणां आंखली जाल्यार एनजीओंक न्यायालयांत वच्चें पडचें ना अशें मुख्यमंत्री डॉ. प्रमोद सावंत हांणी सांगलें.
पर्वरे बेली पूल बांदप गरजेचो
मोपा विमानतळ जाले उपरांत वाहनांचो आंकडो वाडटलो. राष्ट्रीय म्हामार्ग तशेंच रस्तो रूंद करपाची कामां सुरू आसात. पर्वरे बेली पूल जालो जाल्यार येरादारी कोंयडेचो प्रस्न सुटावो जातलो. बेली पूल उबारपा विशीं सरकारान निर्णय घेवंक जाय.
लोकांच्या हिता खातीर खर निर्णय घेवपाची सरकाराची तयारी आसा. रस्त्यार फावो त्या जाग्यार येरादारी खातें सुचोवणी फलक घालतलें. लोकांच्या हिता खातीर टॅक्सी अॅप सेवा गरजेची आसा. टॅक्सीकारांची आपली अॅप टॅक्सी सेवा आतां सुरू जातली अशें येरादारी मंत्री मॉवीन गुदिन्हो हांणी सांगलें.
भौशीक बांदकाम खात्याचे मंत्री निलेश काब्राल हांचेंय उलोवप जालें. 56 टक्के अपघात हे चालकांचे चुकी खातीर जातात अशें पुलीस म्हासंचालक जसपालसिंग हांणी सांगलें.
ओपन फोरमांत 160 नागरीक तशेंच एनजीओंच्या प्रतिनिधींनी वांटो घेवन सुचोवण्यो मांडल्यो. रस्त्याचेर सिग्नल यंत्रणा उबारप, स्पीड ब्रेकर पेंट करप, सुचोवणी फलक लावप , पुलिसांची वेवस्था करप अशे तरेच्यो सुचोवण्यो नागरिकांनी ओपन फोरमात मांडल्यो. धारगळ, पेडणें वाठारांत राष्ट्रीय म्हामार्गाचें काम सुरू आसा. डायव्हरशन तशेंच रस्तो बंद आशिल्ले कडेन सुचोवणी फलक ना. हाका लागून बरेच अपघात जाल्यात अशें नागरिकांनी सांगलें. दिवजा सर्कल, पर्वरे तीन बिल्डिंगे कडेन येरादारी सिग्नलाची मागणी जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
