भांगरभूंय | प्रतिनिधी
पणजी ः फाटलीं कितलींशींच वर्सा गोंय बेळगांव रस्त्याची वायट वेवस्था जाला आनी हाका लागून चोर्ला घांटांत अपघात वाडल्यात. रस्तो फोंडकुलांनी भरिल्ल्यान गाडयांचे लुकसाण जाताच, पूण सदां यो- वच करपी लोकांच्या भलायकेचेरुय परिणाम जावपाक लागला. देखून दोन वर्सां सावन रस्तो दुरुस्त करपाची मागणी जाताली. रस्त्याची दुरुस्ती करपा खातीर 3 कोटी रुपयांची निविदा मंजूर जाल्ली तरी लेगीत रस्त्याची दुरुस्ती अजून जायना. हाका लागून खानापूर तालुक्यांतल्या गोंयचे शिमेर आशिल्ल्या कणकुंबी, आमटे, पारवाड, जांबोटी, बरोडा गांवांतल्या लोकांनी आयज सकाळीं 8 वरांचेर ‘रास्ता रोको’ आंदोलनाक सुरवात केली.
हे संबंदी कर्नाटक पीडब्ल्यूडी, राष्ट्रीय म्हामार्ग प्राधिकरणाचे अधिकारी हांका निवेदन दिवन रस्त्याची दुरुस्ती आनी दोपटीकरणाचे काम सुरू करपाची मागणी केल्ली, पूण प्रशासनान ह्या रस्त्याच्या कामाचेर दुर्लक्ष केले. पीडब्ल्यूडीन रस्ते दुरुस्त करपा खातीर 3 कोटी रुपयांची निविदा मान्य केल्ली. पूण कंत्राटदार काम सुरू करिनात. इतलेंच न्हय तर हो रस्तो ‘एनएच 4’ करपा खातीर केंद्रान 263 कोटी रुपयांची मंजुरी दिल्ली. ह्यो सगळ्यो गजाली कागदाचेर आसात. देखून 15 दिसां आदीं संबंदीतांक निवेदन दिवन रस्तो आडावपाची शिटकावणी नागरिकांनी दिल्ली. ते प्रमाण आयज सकाळीं 8 ते सांजे 5 मेरेन हो रस्तो बंद करतले अशी म्हायती आंदोलकांनी दिली. मजगतीं, सगल्या वाहक चालक आनी वेपाऱ्यांनी हे आंदोलनाक तेंको दिवचो. ताचो सगळ्यांक फायदो जातलो अशेंय आवाहन आंदोलकांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
