भांगरभूंय | प्रतिनिधी
मसलत
नॅशनल क्रायम रेकॉर्डान हालींच एक अहवाल जाहीर केला. ते प्रमाण 2021 वर्सा देशांत 1,55,622 अपघाती मरणां जाल्यांत. फाटल्या वर्साचे तुळेंत ही वाड 13 टक्क्यां परस चड आसा. उत्तर प्रदेशांत सगळ्यांत चड 29,792 जाणांक मरण आयलें. ताचे उपरांत तमिळनाडूंत 15,384 जाणांक. महाराष्ट्र तिसऱ्या क्रमांकाचेर आसा आनी ताचो आंकडो आसा, 13,911. पोरूं देशांत 4,03,116 अपघात जाले. तातूंत 3,71,884 जाण जखमी जाले.
ह्या अपघातांचें विश्लेशण केल्यार तरणाट्यांक मरण येवपाची संख्या 63 टक्के आसा. वेगान गाडी चलोवप, इबाडिल्ले रस्ते, पिवन गाडी चलोवप, जाम जाल्लो आसतना गाडी चलोवप, बेकायदेशीर पार्किंग अशा जायत्या कारणांक लागून अपघात घडटात. सुदारीत मोटार वाहन कायदो उत्तर प्रदेश आनी कर्नाटकांत चालीक लायला, देखून थंय अपघाती मरणांत अनुक्रमान 8.34 आनी 6.41 टक्क्यांनी उणाव जाला.
रस्त्यांचेर गती नियंत्रण दवरपाक, जड वाहनां चलोवपी वाहन चालकांची तपासणी करपाक, रस्त्यांचेर आशिल्ले खड्डे पुरोवपा खातीर उपाय करपाची बेगोबेग गरज आसा. हो आंकडो चड आसा. गाडी चलोवंक शिकतना तांकां प्रशिक्षण दिवंक मेळटा? हाचेरूय विचार करपाची गरज आसा. पालकांनीय आपल्या गाडी चलोवपी भुरग्याक शिटकावपाक जाय. बस, म्हाल व्हरपी जड वाहनां, दुचाकी आनी चारचाकी हांचे खातीर वेगवेगळे लेन केल्यार अपघात सोंपतले.
ह्या अपघातांक आळाबंदा हाडपा विशीं आतां सगले वटेन विचार करपाचो वेळ आयला.
– शांताराम वाघ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
