भांगरभूंय | प्रतिनिधी
पणजीः फाटल्या स वर्सांनी 1300 परस चड लोकांक रस्तो अपघातांनी मरण आयलां. तातूंतले चडशे तरणाटे आसात. हे अपघात आडावपाक सरकाराक अपेस आयलां, अशी टिका विरोधी पक्ष फुडारी युरी आलेमांव हांणी केल्या. असंवेदनशील भाजपा सरकार लोकां मुखार आशिल्ले म्हत्वाचे प्रस्न दुसरे कडेन वळोवपांत गुंग आसा. लोकांच्या जिणे मरणाच्या प्रस्नांक तें उणें म्हत्व दिता अशें आलेमांव हांणी म्हणलें.
रस्ते अपघात आडावपाक आनी तांचीं कारणां सोदून काडपाक भाजपा सरकाराक अपेस आयलां. दर दिसा अपघातांत लोक जीव वगडायत आसात, ही हुस्क्याची गजाल. तरी लेगीत सरकार ह्या प्रस्ना विशीं असंवेदनशील आसा अशें दिसता अशें आलेमांव हांणी सांगलें.
निधी, जॅटपॅक खंय आसा?
2023 वर्सा केंद्रीय रस्तो, येरादारी आनी म्हामार्ग मंत्री नितीन गडकरी हांणी रस्त्यांचे ‘ब्लॅक स्पॉट’ काडून उडोवपाक आनी गोंयांतली रस्त्यांची सुरक्षीतताय वाडोवपाक 100 कोटी रुपयांचो निधी जाहीर केल्लो. सरकारान हे ‘ब्लॅक स्पॉट’ काडून उडयल्यात जाल्यार लोकांक सांगपाक जाय अशें सांगून रस्त्यांचो दर्जो सारको नाशिल्ल्यान रस्ते अपघात जावपाक लागल्यात अशेंय तांणी सांगलें.
मुख्यमंत्री डॉ. प्रमोद सावंत हांणी फोंडकुलां पुरपाचें उतर कांय म्हयन्यां पयलीं दिल्लें. पूण आयज लेगीत जायत्या रस्त्यांचेर फोंडकुलां आसात. आनी हेच रस्ते अपघाताचें एक कारण. तीं पुरोवपा खातीर हाडिल्लें जेट पॅचर मशीन आनी फोंडकुलांची म्हायती दिवपा खातीर आशिल्ली व्हॉट्सअॅप सेवा बंद पडल्या अशें आलेमांव हांणी नदरेक हाडून दिलें.
रस्त्याची सुरक्षीतताय सुनिश्चीत करपा खातीर आनी अपघातांक जापसालदार आशिल्ल्यांक जापसालदार धरपा खातीर उपाय येवजण करपाची गरज आसा. फाटल्या स वर्सांत रस्ते अपघातांत 1300 परस चड लोकांक मरण आयलां. देखून अपघात आडावपा खातीर सरकारान रस्त्यांच्या आराखड्यांचो आनी उपाय येवजणांचो अभ्यास करचो अशें आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
