भांगरभूंय | प्रतिनिधी
प्रभारी कुलगुरू प्रो. विद्यादत्त शेट वेरेंकार हांची राष्ट्रीय परिसंवादांत मागणी
भांगरभूंय । प्रतिनिधी
पणजीः रवीन्द्र केळेकार हांची याद सासणा खातीर उरची म्हूण फक्त कार्यावळी करून जावचें ना. सरकारान गोंय विद्यापिठांत भाशा संकूल बांदून ताका रवीन्द्र केळेकार हांचें नांव दिवचें, ती खरी आर्गां थारतलीं. जे ज्ञानपीठ पुरस्काराचे झाड रवीन्द्रबाबान लायिल्लें तें आयचे पिगळेन व्हड करचें, असो उलो गोंय विद्यापिठाचे प्रभारी कुलगुरू प्रो. विद्यादत्त शेट वेरेंकार हांणी मारलो.
कोंकणी अध्ययन फांटो, शणै गोंयबाब भाशा आनी साहित्य महाशाला, गोंय विद्यापीठ आनी गोवा कोंकणी अकादेमी, राजभाशा संचालनालय हांच्या जोडपालवान विद्यापिठाच्या सभाघरांत ‘कोंकणी साहित्य आनी चळवळींतलो चिरंतन दिशादर्शकः रवीन्द्र केळेकार’ हो दोन दिसांचो राष्ट्रीय परिसंवाद बिरेस्तारा घडोवन हाडलो. ह्या वेळार विद्यादत्त शेट वेरेंकार हे कार्यावळीचे अध्यक्ष म्हूण उलयताले.
ह्या वेळार गोवा कोंकणी अकादेमीचे अध्यक्ष वसंत सावंत, शणै गोंयबाब भाशा आनी साहित्य महाशालाचे अधिश्ठाता प्रो. अनुराधा वागळे, कोंकणी अध्ययन फांट्याचे संचालक हनुमंत चोपडेकार, परिशदेची संयोजिका कृपाली नायक आनी सोनिया गडकार हजर आसली. ह्या वेळार मानेस्तांक पुस्तकां भेट दिलीं तशेंच ‘सासाय’ हें पुस्तक मानेस्ता हस्तुकीं उजवाडाक हाडलें.
विद्यादत्त शेट वेरेंकार हांणी सांगलें, विज्ञान फांट्याचे प्राध्यापक म्हूण तांकां रवीन्द्र केळेकार हांचे विशीं खबर नाशिल्लें. रवीन्द्रबाबा विशीं उलोवपाचें आसा म्हूण आपल्याक सांगलें तेन्ना गाडयेंतल्यान घरा वतना वेळ मेळटालो तेन्ना तांचे विशीं व्हिडीओ आपणे पळयले. पयले साहित्य अकादेमीचे पुरस्कार जैतवंत आशिल्ले रवीन्द्रबाबांनी गोंयांत साहित्य अकादेमीचें पयलें झाड लायलें. उपरांत खूबश्या कोंकणी साहित्यिकांक पुरस्कार मेळून तें झाड व्हड जावन तांकां फळां आनी फुलां आयलीं. तांणी आनीक एक झाड लायलें तें ज्ञानपीठ पुरस्काराचें. उपरांत दामोदर (भाई) मावजो हांणी तें व्हड केलें. ताका फुलां आनी फळां येवपाचीं उरल्यांत आनी तें काम आतांच्या साहित्यकारांनी करचें, असो उलो वेरेंकार हांणी मारलो.
आमी वर्सांत एकदां कार्यावळ करतात आनी ती सोंपले उपरांत तांची याद सोंपता. कार्यावळींक तेंको दिवप हें सरकाराचें कामूच आसा. पूण अशें कितें करात जे वरवीं तांची याद सासणा खातीर उरतली. देखून आपूण सरकारा कडेन विनवणी करता, जर तुमकां रवीन्द्रबाबांक खरी आर्गां ओंपपाचीं आसा जाल्यार एक भाशा संकूल वा भाशा भवन विद्यापिठांत बांदचें आनी ताका रवींद्रबाब केळेकार हांचें नांव दिवचें, अशें वेरेंकार हांणी सांगलें.
रवींद्र केळेकार हे कशे आशिल्ले, कितें आशिल्ले हें गोंयकारांक कळपाक जाय, तांचे विशीं समजून घेवपाची ओड निर्माण करतले जाल्यार तांच्या नांवान भाशा संकूल हें गरजेचें. दोन – तीन हजार भुरगीं विद्यापिठांत येतात. तांची ह्या संकुलाचेर नदर पडटली आनी पद्म पुरस्कार रवींद्र केळाकार म्हूण एक नामनेचे व्यक्ती आशिल्ले, तांच्या नांवान ही इमारत बांदल्या हे खातीर ते रस घेवन तांचे विशीं वाचतले, अशें मत वेरेंकार हांणी मांडलें.
कोंकणीचे उदरगती खातीर वावुरतना योग्य मार्गदर्शन जावचें म्हूण रवींद्रबाब केळेकार हे सेगीत वावुरताले, अशें कोंकणी अकादेमीचे अध्यक्ष वसंत सावंत हांणी सांगलें. कोंकणीचेर कसलेंय अरिश्ट आयलें वा आरोप जालो जाल्यार तो आरोप मुळा सयत हुमटून काडप, तांकां समर्पक कशी जाप दिवप हाचें रवींद्रबाबा कडल्यान मार्गदर्शन मेळटाले. आयज लेगीत कोंकणीचे उदरगती खातीर तांचे विचार निश्चितूच उर्बा दितात. ह्या दोन दिसांच्या परिसंवादांत खूबश्यो गजाली भायर सरतल्यो आनी कोंकणीचे उदरगतीक प्रेरणा दितल्यो अशी आस्त बाळगितां, अशें सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
