योग सत्राक सक्ती करपाचो सरकाराक अधिकार ना

भांगरभूंय | प्रतिनिधी

युरी आलेमांवः कार्नावालाक गिराण लावपाचो हेत आशिल्ल्याचो आरोप

भांगरभूंय । प्रतिनिधी

मडगांवः गोंयच्या परंपरीक कार्नावाल महोत्सवाक गिराण लावपाचो तशेंच सगळें शिक्षक, एनसीसी, एनएसएस, स्कावट आनी गायड स्वयंसेवकांक सोमारा 30 फेब्रुवारीक बाबा रामदेव हांच्या योग सत्राक हाजीर रावपाची सक्ती करपाचो भाजपा सरकाराक अधिकार ना. शिक्षण खात्यान जारी केल्लें परिपत्रक बेगोबेग फाटीं घेवचें, अशी मागणी विरोधी पक्ष फुडारी युरी आलेमांव हांणी केल्या.

भाजपाचे ब्रँण्ड अँबासिडर बाबा रामदेव हांची भेट, तांच्या योग सत्राचो वेळ आनी सरकारान गोंयच्या परंपरीक कार्नावाल उत्सवाक परवानगी न्हयकारप हो गोंयच्या कार्नावाल उत्सवाक गिराण रावपाचो भाजपा सरकाराच्या व्हड कारस्थानाचो एक वांटो. योग शिबिराचे खाजही कार्यावळीक गर्दी एकठांय करचे खातीर जारी केल्लें शिक्षण खात्याचें परिपत्रक ताकतिकेन फाटीं घेवचें, अशें युरी आलेमांव हांणी मागलां.

मुख्यमंत्री डॉ. प्रमोद सावंत हांच्या फुडारपणा खाला इव्हेंट मॅनेजर भाजपा सरकाराक खाजगी संस्थेच्या योग सत्राक उणो प्रतिसाद मेळटलो असो भंय सतायता. हेच खातीर शिक्षक, एनएसएस, स्कावट आनी गायडाच्या स्वयंसेवकांक बाबा रामदेव हांच्या योग सत्राक हाजीर रावपाची सक्ती केल्या. हें परिपत्रक बेगोबेग फाटीं घेवचें, अशी मागणी काँग्रेस प्रदेशाध्यक्ष अमीत पाटकार हांणी केल्या.

योग सत्राक कोणाकूच सक्ती करपाचो सरकाराक अधिकार ना. शासनाच्या परिपत्रकाक लागून सोमारा सांजे वेळार नियमीत वर्ग जावचे नात. खाजगी कार्यावळीक उर्बा दिवपा खातीर ही अघोशीत सुटी काय कितें, असो प्रस्न अमीत पाटकार हांणी केला. आरएसएसचे सहयोगी आनी भाजपाचे ब्रँड अँबेसेडर हांणी आयोजीत केल्ले कार्यावळी खातीर भाजपा सरकारान वेळावेळार आपलो तेंको दिला. योग शिबिराक सरकार कितले पयशे मोडटा, हाचेर लक्ष आसा, अशें तांणी शिटकायलां. मुख्यमंत्री डॉ. प्रमोद सावंत हांणी खाजगी कार्यावळीक उर्बा दिवपांत इतलो रस घेवचे परस पॅरा शिक्षकांक वेळार पगार दिवपाचेर, मदले सुटयेंतल्या खाणाची पुरवण करप्यांक थकबाकी दिवपाचेर  आनी बालरथ चालकांचे प्रस्न सुटावे करपाचेर भर दिवचो, अशी मागणी काँग्रेसीच्या दोनूय फुडाऱ्यांनी केल्या.