भांगरभूंय | प्रतिनिधी
योग दिसाची आंतरराश्ट्रीय पांवड्यार सुमार णव वर्सां आदीं सुरवात जाली. प्रधानमंत्री नरेंद्र मोदी हांचे प्रेरणेचेर संयुक्त राश्ट्रांत भारताचे कायम प्रतिनिधी अशोक मुखर्जी हांणी संयुक्त राश्ट्रांत योग दिसा विशीं एक थाराव मांडलो आनी ताका 177 राश्ट्रांची सोमतीच मान्यताय मेळ्ळी. 11 डिसेंबर 2014 दिसा संयुक्त राष्ट्रांच्या महासंघान 21 जून हो संवसारीक योग दीस म्हूण मनोवपाक मान्यताय दिली. 21 जून हो वर्साचो सगळ्यांत लांब दीस. उत्तरायण सोंपता आनी त्याच दिसा दक्षिणायन सुरू जाता. ह्या काळांत मेळिल्ली उर्जा सगळ्या जिवांक फायदेशीर आसता. योग हें भारताचें संवसाराक दिल्लें अमूल्य आनी सासणाचें दान.
संवसारांतले सगळ्यांत पोरने ग्रंथ ऋग्वेदांत, नारदीय सूक्त आनी भगवतगीतेंत योगाचो जायते फावट उल्लेख आयला. महाभारताच्या शांती पर्वांत लेगीत योगाचो उल्लेख केला. योगाचे मूळ 10 हजार वर्सां मेरेन फाटीं आसा. पतंजली मुनीन इ. स. पयलीं 150 वर्सा योगाचेर योगसूत्रां बरयल्यांत. पुर्विल्ल्या मोहेंजोदाडो, हडप्पा संस्कृतायेंत योगाच्या आसनांच्यो जायत्यो मूर्ती मेळ्ळ्यात. आमचे कडेन स तत्वगिन्यानां आसात, तातूंतलेय योग हें एक तत्वगिन्यान. वेद उपनिषदांतय योगाचो उल्लेख आसा.
बी. के. एस. अय्यंगार हांणी हालींच्या वर्सांनी योगाची शास्त्रशुद्ध बुन्याद घाली. मागीर गुरू बाबा रामदेव हांणी तो संवसाराच्या खाची-कोनशांनी पावयलो. स्वामी शिवानंद हांणीय कितल्याशाच वर्सां सावन योगाचो प्रसार आनी प्रचार करपाचो म्हत्वाचो वावर केला. ह्या तिगांयनी सामान्य लोकांक योगाची वळख करून दिली. गुरुदेव श्री रवीशंकर म्हणटात “योग म्हळ्यार फकत व्यायाम आनी मुद्रा न्हय. भावनीक संतुळा आनी त्या शाश्वत आनी अनंत तत्त्वाचो स्पर्श करून अध्यात्मीक उदरगतींतल्या सगल्या शक्यतायांची वळख करुन दिवपी हें शास्त्र.’
योग हें एक पुराय शास्त्र. ही एक पुराय जिणे पद्दत. ही एक पुराय बरे करपाची पद्दत, जी तुमकां नकारात्मकांतल्यान सकारात्मकांत, ताणांतल्यान सुखांत वचपाचें मार्गदर्शन करता. योग म्हळ्यार जीवात्म आनी परमात्म हांचो संयोग. आयज जायत्या शाळांनी योगाचे धडे दितात. सूर्यनमस्कार हो एक बरो सोबीत व्यायाम. आयज जायत्या सुवातींनी योग शिबिरां आयोजीत करतात.
योग हो फकत एका दिसांत शिवपाची वा करपाची गजाल न्हय, तो नेमान केल्यारुच ताचे परिणाम दिसतले. दर दिसा योगा करपाक थोडो वेळ दिल्यार आनी तो नेमान केल्यार ताचो शारिरीक आनी मानसीक फायदो जातलो. चिंतेची भावना, दुस्वास, भंय दिसल्यार कुडींतले हार्मोन वाडटा आनी रगतांतली साकर वाडटा. दिसपट्टे जिणेंत योगाचो योग्य आस्पाव केल्यार रगतांतली साकर नियंत्रीत उरपाक मजत जाता. तुमी तरणाटे आसूं वा जाण्टे, भलायकेन बरे आसूं वा दुयेंत आसूं योग सगल्या खातीर फायदेशीर आसता. आनी तो सगल्यांक उदरगतीच्या मार्गाचेर व्हरता.
योगांतल्या प्राणायामाचे जायते फायदे आसात. आमी 500 मि.ली.चो एक स्वास घेतात. तेंच प्राणायाम करून आमी 4500 मेरेन वचूंक शकतात. हाका लागून रगतांत ऑक्सिजनाचें प्रमाण वाडटा. रोगप्रतिकार शक्त वाडटा. काळजाचे, फुफ्फुसाचे आनी मेंदवाचे दुयेंस पयस वतात. मन शांत आनी स्थिर जाता. आयुश्य वाडटा. मनाची अस्वस्थताय पयस जाता.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
