भांगरभूंय | प्रतिनिधी
आयज काल व्यायाम करप हो जणएकल्याचो जिणेचो वेगळांव नज असो घटक जाला. ल्हान – व्हड सगल्यांक व्यायामाचें व्यसन लागलां. जो तो रस्त्यार, मैदानाचेर धांवतना दिसता.
आमच्या भारत देशान वर्साचे 365 दीस कसल्या ना कसल्या गजाली खातीर उमेदीन मनयतात. दरेका दिसाची वेगवेगळी खासीयत जावन आसा. आयज 21 जूनाक आंतरराष्ट्रीय योग दीस म्हूण संबंद भारतांत मनयतात. ह्या दिसा करोडांनी नागरीक योग करतात. योग एकच दीस न्हय तर सदाच नित्य नेमान करप चड गरजेचें. योग अमुकुच म्हणजे मठ, आश्रम, महाविद्यालय अशा जाग्यारुच करपाक वचुंक जाय अशें ना. आपणाक सोंपें दिसता त्या जाग्यार बसून योग करप चड गरजेचे. आपल्या घरातल्या एक मोठ्या हॅालान नाजाल्यार बल्कावांत पसून योगा करप खरेंच बरें.
आतां योग करतना थोडे नेम, अटी पाळप चड गरजेचें. योगासन म्हणटा तें उपाशी पोटार करप. कोणाकूय दुबळेंपण आसा जाल्यार तांणी हुनहुनीत उदकांत म्होंवाचे दोन थेबे घालून पियोवचें.
जेन्ना योग करुंक मनीस बसता तेन्ना जमखणाचेर बसप बरें. जाय तशे हात पाय सोडूक मेळटात आनी योग बरो जाता. सगळ्यांत पयलीं योगासन करपाक खोशेचें वातावरण आनी जण एकल्याचें मन शांत आसप चड गरजेचें. आपली कूड आनी स्वास बाळगून ल्हवू ल्हवू योग सुरु करप. घरांतले चड काम, ताणतणाव जावं कसलेंय दुयेंस आसा तांणी योग करुंक जायना. चलयांनी मासीक पाळये वेळार थोडीं आसनां करुंक जायनात. जेवले उपरांत रोखडोच योग करुंक जायना. तशेंच तो करून रोखडेंच न्हांवक वचूंक जायना. जेवण वा उदक पिवपाक जायना.
कोणाचें ऑपरेशन वा कसलोय मार, भलायकीची कागाळ आशिल्यान योग करुंक जायना, अशें जाणकार लोकांचें मत जावन आसा. आतां योग केल्ल्यान खरेंच जण एकल्याक खूब फायदे जातात, हें तितलेंच खरें. मन शांत रावता, कुडीची सर्वांगी उदरगत जाता, भलायकी बरी उरता, जेवणुय बरें वता, कुडीची वाड जाता, रक्ताभिसरण जाता. दिसान दीस प्रकृती ठणठणीत उरता, योग करतकच हलको फुलको आहार खावपाक जाय. शीत, दाळ, टाॅमेटो, सफरचंद, बीट, गाजर सुप दिसाक दोन फावटी पिवप. धंय, ताक जेवले उपरांत पिवप.
सिध्दी तिळवे
7972535321
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
