भांगरभूंय | प्रतिनिधी
प्रवीण परब: सत्तरी म्हालांत गोंय मुक्ती दीस उमेदीन
वाळपय: गोंयचे उदरगतींत नागरिकांचें सहकार्य गरजेचेें. सरकारा वरवीं जाहीर केल्ल्या दरेका येवजण्यांचो फायदो सगळे कडेन पावोवपाचे नदरेन नागरिकांनी सरकाराक सहकार्य करचें असो उलो सत्तरी म्हालाची उपजिल्होधिकारी प्रवीण परब हांणी दिलो.
गोंय मुक्ती दिसा निमतान सत्तरी म्हाल उपजिल्होधिकारी कार्यालया फुडल्यान आयोजीत केल्ले कार्यावळींत ते उलयताले. हे कार्यावळीक वाळपय वाठारांतल्या सरकारी कर्मचार्यांनी दांडी मारली. ताका लागून नागरिकांनी तिडक उक्तायली.
ह्या वेळार माचयेर गोवा राज्याचे आदले उपसभापती नरहरी हळदणकार, जोड मालमलेदार अपूर्वा कर्पे, वाळपय गटविकास अधिकारी तशेंच नगरपालिकेचे अधिकारी सुर्याजीराव राणे हाजीर आशिल्ले.
उपजिल्होधिकारी प्रवीण परब हांणी, गोंयचे मुक्ती खातीर सत्तरीच्या सुटके झुजार्यांचेंय योगदान आसा. हें तांचें योगदान विसरचें न्हय देखून समाजीक संस्थांनी सतत सुटके झुजार्यांच्या त्यागाची वळख तरणाटे पिळगेक करून दिवप गरजेचें अशें तांणी सांगलें.
नरहरी हळदणकार हांणी, गोंयचे मुक्ती उपरांत गोंयांत जायतें सरकार येवन गेलें. दरेका सरकारान आपले तरेन उदरगत चालीक लायली. ताका लागून दरेकल्याचें योगदान म्हत्वाचें हें विसरचें न्हय, असो उलो तांणी दिलो.
सुरवातेक उपजिल्होधिकारी प्रवीण परब हांचे हस्तुकीं तिरंगो हुबयलो. ह्या वेळार हाजीर आशिल्ल्या पुलिसांनी तिरंग्याक मानवंदना दिली.
वाळपय आवर लेडी ऑफ लुड्स हायस्कुलाच्या विद्यार्थ्यांनी राष्ट्रगीत सादर केलें. पुराय कार्यावळीचें सुत्रसंचालन विद्यालयाचे शिक्षक हरीश कामत हांणी केलें आनी निमाणें जोड मामलेदार अपुर्वा कर्पे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.