येत्या फेब्रुवारी सावन व्हाळवाट आनी म्हादय न्हंय नितळ करतलेंः मंत्री शिरोडकार

भांगरभूंय | प्रतिनिधी

पणजी ः राज्यांतल्या न्हंयांच्या वाठारांनी रावपी थळावे लोक घरगुती कोयर, झाडां नाल्यांनी वा न्हंयांनी उडयतात. ताचो सांठो जाल्ल्यान आनी अंदूं विक्रमी पावस पडपाक लागून व्हाळवाट आनी शापोरा न्हंयांक हुंवार आयलो. देखून येत्या फेब्रुवारी सावन व्हाळवाट आनी म्हादय न्हंयेंतलो चिखल काडपाची प्रक्रिया सुरू जातली अशें उदकास्रोत मंत्री सुभाष शिरोडकार हांणी मंगळारा विधानसभेंत सांगलें.
आमदार प्रेमेंद्र शेट हांणी प्रस्न-जाप वेळार हे संबंदी प्रस्न विचारिल्लो. अंदूं जुलय म्हयन्यांतल्या पावसाक लागून व्हळवाट न्हंयेक हुंवार येवन न्हंयेंच्या वाठारांतलें लुकसाण जालें. व्हाळवाट न्हंयेंतलो चिखल आठ वर्सां आदीं काडिल्लो. ते उपरांत न्हंयेंतलो चिखल काडलो ना. दर वर्सा पावसाच्या आदीं न्हंयांचें सर्वेक्षण करून तातूंतलो कोयर निवळ करप ही सरकाराची जापसालदारकी आसा अशें आमदार शेट हांणी सांगलें.
शेट हांच्या प्रस्नांक जाप दितना मंत्री शिरोडकार हांणी सांगलें, सात ते आठ वर्सां आदीं सुमार चार कोटी रुपया खर्च करून व्हाळवाट न्हंयेंतलो चिखल काडिल्लो. न्हंयांक हुंवार येवपाक नागरिकय जापसालदार आसात. घरगुती कोयर, कापल्लीं वा सुकीं झाडां थळाव्या न्हंयांनी उडयतात. नाल्यांतलो कोयर पावसाच्या दिसांनी व्हांवून न्हंयांनी वता. व्हड पावसाच्या वेळार कोयर न्हंयांनी आडकून उरता आनी ताका लागून हुंवार येता. ते खातीर नागरिकांनी कोयर न्हंयांनी उडोवचो न्हय अशें आवाहन तांणी ह्या वेळार केलें.
राज्यांत अंदूं आतां मेरेन 120 इंचा परस चड पावस पडला. दर वर्सा पुराय मान्सून हंगामात पडटा तितलो पावस अंदूं जून आनी जुलय म्हयन्यांत पडलो. जुलयांत 80 इंचा परस चड पावस पडून राज्यांतल्या चडशा न्हंयांक हुंवार आयिल्लो. फुडाराकूय असो पावस पडूं येता. देखून थळाव्या लोकांनी आतां सावन जतनाय घेवप गरजेचें अशें मंत्री शिरोडकार हांणी सांगलें.

आचारसंहितेक लागून चिखल काडूंक मेळ्ळो ना: शिरोडकार
अंदूं उमाळ्यांत तीन म्हयने लोकसभा वेंचणुकेचे आचारसंहिते खातीर न्हंयांतलो चिखल निवळ करप शक्य जालें ना. पूण, येत्या नोव्हेंबर वा डिसेंबरांत न्हंयांची पळोवणी जातली आनी जानेवारी वा फेब्रुवारी सावन व्हाळवाट, म्हदय न्हंयांतलो चिखल काडपाक सुरवात जातली अशें मंत्री सुभाष शिरोडकार हांणी सांगलें.