युवा भारता मुखार नव्या झिम्बाब्वेचें आव्हान

भांगरभूंय | प्रतिनिधी

भारत आनी झिम्बाब्वे ह्या पंगडां मदीं वन डे माळेंतली पयली मॅच जातली. दोनूय पंगडांचेर नदर मारली जाल्यार भारताचें दालें जड दिसता. पूण, हालींसाराक झिम्बाब्वेन अपेक्षे परस उरफाटें प्रदर्शन केलां. झिम्बाब्वे एक दुबळो पंगड अशें सगले जाण मानतात. पूण, अंदूं ताणें 2016 उपरांत पयले खेपे संवसारीक टी-20 सर्तीची पात्रताय मेळयल्या. तशेंच बांगलादेशाक टी-20 माळेंत 2-1 आनी वन डे माळेंत 2-1 फरकान हारयला.

बांगलादेशा आडचे माळेंत झिम्बाब्वेक सिकंदर रजा आनी रायन बर्ल सारके मॅच जिखून दिवपी खेळगडे सांपडले. रजा अंदूं आतां मेरेन णव वन डे मॅची खेळ्ळा. हातूंत दोन शेंकड्यांचो आनी दोन अर्द शेंकड्यांचो आस्पाव आसा.

दुसरे वटेन लोकेश राहुल भारताच्या पंगडांत खूब तेंपा उपरांत पुनरागमन करता आनी आशिया करंड सर्तीची तयारी करपाचे दिश्टीन ताचे खातीर ही माळ म्हत्वाची आसा. तो निमाणे खेपे मे म्हयन्यांत आयपीएलांतले अॅलिमिनेटरा खातीर मैदानांत देंविल्लो.

शुभमन गिल आनी शिखर धवन हांणी वॅस्ट इंडिजाचे भोंवडेर उत्कृश्ठ प्रदर्शन केल्लें. ते आपलो फॉर्म झिम्बाब्वेचे भोंवडेर लेगीत कायम दवरपाक इत्सूक आसतले.

भारत सध्या ऑक्टोबरांत जावपी संवसारीक टी-20 सर्तीची तयारी करपाक लागला. पंगडाचे निवडी वयल्यान हें स्पश्ट जाता. झिम्बाब्वे आड जावपी वन डे माळे खातीर पंगडान साबार युवा टी-20 खेळगड्यांक संद दिल्या. ऑस्ट्रेलियेंत जावपी संवसारीक टी-20 सर्ती खातीर आपलो दावो घट करपाक ते इत्सूक आसतले.

ह्या खेळगड्यां मदीं सगल्यांत वयले सुवातेर दीपक चहराचें नांव येता. राहुला भशेन तो लेगीत जखमी आशिल्ल्यान पंगडांतल्यान भायर आशिल्लो. राहुल त्रिपाठी आनी शाहबाज अहमद हे लेगीत हे माळे वरवीं आंतरराष्ट्रीय क्रिकेटींत पदार्पण करपाक शकता. दोगांयनी आयपीएलांत जबरदस्त प्रदर्शन केल्लें.

माळेंतल्यो तिनूय मॅच हरारेंत जातल्यो. खेळपट्टी बॅट्समनां खातीर अनुकूल आसा. भारत 2013 पसून ह्या मैदानाचेर वट्ट णव मॅची खेळ्ळा आनी सगल्या मॅचींनी जैत जोडलां. पूण, हे खेपे झिम्बाब्वेक उणो लेखप भारताक म्हारग पडुये. धवनान लेगीत हे गजालीक मान्य केल्या.

बांगलादेशा आड झिम्बाब्वेन जैत जोडलां. सध्या झिम्बाब्वे बरी क्रिकेट खेळटा आनी आमचे खातीर ही बरी गजाल आसा. आमी खंयच्याच प्रतिस्पर्धी पंगडाक उणो लेखिनात अशें धवनान म्हणलां.