युवा जागृती महोत्सव शेनवारा

युवा जागृती महोत्सवाची म्हायती दितना वेगा मणेरीकार. कुशीक गोरख मांद्रेंकार आनी डॉ. साईश देशपांडे.

भांगरभूंय | प्रतिनिधी

तरेकवार सर्ती; 17 राज्यांतले विद्यार्थी घेतले वांटो

भांगरभूंय । प्रतिनिधी

पणजीः युवा जागृती संस्थेन मिनेझीस ब्रागांझा संस्थेच्या पालवान शेनवारा 11 फेब्रुवारीक पणजे तिसऱ्या युवा जागृती महोत्सवाचें आयोजन केलां.

ही कार्यावळ विद्यार्थी तशेंच तरणाट्यां खातीर उक्ती आसा. युवा जागृतीचे प्रकल्प समन्वयक वेदा मणेरीकार हांणी पत्रकार परिशदेंत युवा जागृती महोत्सवाची म्हायती दिली. ह्या वेळार प्रकल्प मुखेली डॉ, साईश देशपांडे आनी मिनेझीस ब्रागांझा संस्थेचे वांगडी सचीव गोरख मांद्रेंकार हाजीर आशिल्ले.

अंदूंच्यो कार्यावळी जैवविविधताय संकल्पनेचेर जातल्यो. तरेकवार सर्ती खातीर आसाम, मणिपूर, उत्तर प्रदेश, बिहार, कर्नाटक, ओरिसा अशा वट्ट 17 राज्यांतल्यान ऑनलायन स्वरुपांत 240 परस चड प्रवेशिका आयल्यात. गोंयांतल्या तरणाट्यांक तशेंच विद्यार्थ्यांक ह्या महोत्सवांत वांटेकार जावपाची संद मेळटली.

शेनवारा सकाळीं कार्यावळींक सुरवात जातली. विद्यालयीन विद्यार्थ्यां खातीर गायन सर्त तशेंच वण्टीचित्र सर्त जातली. म्हाविद्यालयीन विद्यार्थ्यां खातीर पथनाट्य सर्त जातली. सर्ती उपरांत उक्ती माची ही कार्यावळ जातली. ही कार्यावळ सगळ्यां खातीर उक्ती आसा. दनपारां इनामां भेटवण सुवाळो जातलो.

युवा जागृती संस्था दर वर्सां युवा जागृती महोत्सवाचें आयोजन करता. अंदूं ऑनलायन तशेंच ऑफलायन स्वरुपांत कार्यावळी जातल्यो. स्वामी विवेकानंदांचें विचार फुडें व्हरपा खातीर युवा जागृती महोत्सवाचें आयोजन जाता, अशें गोरख मांद्रेंकार हांणी ह्या वेळार सांगलें.