युवा उत्सवः तरणाट्यांचो कला मंच

भांगरभूंय | प्रतिनिधी

भा रत हो समृद्ध संस्कृतायो आनी हेर दायजांनी नटला. संवसारांतलो सगळ्यांत तरणाटो देस म्हणल्यार भारत. 75 टक्के लोक तरणाटे आसात. तरणाट्यांच्या सत्तेचें केंद्र आशिल्ल्या भारतान ही तरणाटी पिळगी राश्ट्रीय चारित्र्याची भावना संपन्न करपाचेर लक्ष केंद्रीत केलां. ही गरज वळखून भारत सरकाराच्या ‘खेळ आनी युवा वेव्हार मंत्रालय’ खाला ‘नेहरू युवा केंद्रा’ न सांखळेच्या रवींद्र भवनांत कांय म्हयन्यां पयलीं ‘युवा उत्सव’ येसस्वीपणान घडोवन हाडलो. हेर वाठारांतलें, धर्मातलें, कलांचे तरणाटे एकीकडे हाडपाक हो मंच आशिल्लो.
राज्याच्या गिरेस्त संस्कृतीक इतिहासाची गवाय गोंयची लोककला दिता. तिचें दायज तरणाटे पिळगेक दिवपाचें काम युवा उत्सवा वरवीं जालां. युवा उत्सवान वकृत्व, नाच, चित्रकला, कविता बरोवप, संवाद, देशभक्तीचेर पदां, फोटोग्राफी अश्यो हेर सर्ती घडोवन हाडल्यो. आयच्या तरणाट्यांनी आपली परंपरा आनी लोकसंस्कृताय तिगोवन दवरपाची गरज आसा. पूण, आमी पळयतात की आयची तरणाटी पिळगी लोककलेच्या प्रकारां कडेन आकर्शीत जायना. लोकदायजाची राखण करपा खातीर आयोजीत केल्ले लोकनाच सर्ती खातीर नेहरू युवा केंद्राची तोखणाय करपाक फावो.
ह्या उत्सवान म्हाका रांगोळी घालपाची संद मेळीं. दुसरे दिसा हांव युवा गोमंतक दलाच्या वतीन एक स्पर्धक म्हणून थंय आशिल्लें. तेन्ना हांवे स्पर्धक म्हणूनय जायतो अणभव घेतलो.
युवा उत्सवाची एक खाशेली गजाल मळ्यार ‘संमेलन कट्टा’. तरणाट्यांक आपले विचार मुखार दवरपाची माची. थंय लोकांनी जायते संदेश, पदां, चित्रां, व्यंगचित्रां काडून युवा महोत्सवा विशीं भावना व्यक्त केली.
तरणाट्यांच्या विचारांक एक मंच दिवपाक, समाजाच्या ज्वलंत प्रस्नांचेर तरणाटे पिळगेचे विचार जाणून घेवपाक ‘युवा संवाद’ सारको अभिनव प्रयोग खूब यशस्वी जालो. देशाचो फुडार तरणाटे, राष्ट्राचें बळगें तरणाटे. तरणाट्यांच्या मनांत देशभक्तीची भावना जिवी दवरपा खातीर ‘युव उत्सवा’ चो एक घटक आशिल्ली, देशभक्ती गीत गायन सर्त.
वक्तृत्व ही आयच्या काळांतली एक म्हत्वाची कुशळटाय. तरणाट्या पिळगे मदीं ती वाडोवपा खातीर एक वक्तृत्व सर्त घडोवन हाडिल्ली. साहित्य म्हळ्यार समाजाची मेरुरज्जू. युवा उत्सवा वरवीं तरणाट्या लेखकांक उर्बा दिवपाक कविता लेखन सर्त, चित्रकला सर्त, मोबायल छायाचित्रण सर्त अशो जायत्यो ल्हान, व्हड सर्ती पळोवपाची संद म्हाका मेळ्ळी.
युवा उत्सव फकत शैक्षणिक संस्थां खातीरच न्हय तर सांस्कृतिक पंगडां खातीरुय आशिल्लो. गांवांतले पंगड एकसटीन येवन तांकां मंच मेळचो, होच हेतू हातुंतल्यान दिसतां. श्याम पुरुष कला पथक सर्वण, श्री देवी माऊली कला क्रिडा मंडळ मेणकुरें, युवा गोमंतक दल- मये, दिवचलची युवा पिळगी, जे. सी. आई – साखळी अशे हेर पंगड उत्सवाचे वांटेकार आशिल्ले. हजारभर तरणाटे युवा उत्सवाचे वांटेकार आशिल्ले. नेहरु युवा केंद्र गेलीं कितलींशींच वर्सा वेगवेगळ्यो सर्ती करुन आमचे दायज तिगोवपाचो यत्न करता. तरणाट्यांच्या मनांत उजवाड फाकयता. ह्या युवा उत्सवान दायज आमचे लखलखलें. असल्यो कार्यावळी खरे म्हणल्यार आयची गरज, आयची चळवळी. तेन्ना नेहरु युवा केन्द्राच्या हे वाटचालीक खुब खुब शुभेत्सा.

हर्षा हनुमंत कवठणकार
9823791448