भांगरभूंय | प्रतिनिधी
खबरां संस्था
इंदूरः भारत आनी अफगाणिस्तान हाचे मदल्या तीन मॅचींच्या टी-20 माळेंतली इंदूरच्या होळकर स्टेडियमार खेळयल्ली दुसरी मॅच 6 विकेटीनी जिखून भारतान माळेंत 2-0 अशी आघाडी घेतली. भारतान टॉस जिखून पयली बॉलिंग करपाचो निर्णय घेतलो. अफगाणिस्तानाचो पंगडान आपल्या डावांत 20 ओव्हरीत 172 धांवड्यो केल्यो. ताका जाप दितना भारतान यशस्वी- शिवम हाच्या अर्द शेंकड्यांच्या नेटार 14.4 ओव्हरीत 4 आवट 173 धांवड्यो करून माळ जिखली. बंगळुरूत 17 जानेवारीक जावपी तिसरी मॅच जिखून अफगाणिस्तानाक व्हायट वॉश दिवपाची भारताक संद आसा.
यशस्वी जयस्वालान 34 बॉलांत सगल्यांत चड 68 धांवड्यो केल्यो. ताणे 5 चौके आनी 6 सक्ये मारले. शिवम दुबेन 32 बॉलांत नाबाद 63 धावड्यो केल्यो. ताणेय 5 चौके आनी 4 सके हुबयले. विराट कोहलीन 16 बॉलांत 29 धांवड्यांची आकर्शक खेळी केली. कॅप्टन रोहित शर्मा आनी विकेटकीपर बॅट्समन जितेश शर्मा शून्याचेर आवट जाले. रिंकू सिंग 9 धांवड्यांचेर नाबाद रावलो. अफगाणिस्ताना खातीर करीम जानतान दोन विकेटी घेतल्यो. फुजुल्ला फारुकी आनी नवीन उल हक हांकां देरकी एक विकेट मेळ्ळी.
कॅप्टन रोहित शर्मा टॉस जिखून अफगाणिस्तानाक पयलीं बॅटिंग करपाक सांगलें. ताणी 20 ओव्हरींत 172 धांवड्यो केल्यो. अश्टतासी गुलबदि नायबान 35 बॉलांत सगल्यांत चड 57 धांवड्यो केल्यो. तातूंत 5 चौके आनी 4 सक्यांचो आसपाव आशिल्लो. भारता खातीर अर्शदीप सिंग येसस्वी बॉलर थारलो. ताणे 4 ओव्हरींत 32 धांवड्यो दिवंन 3 विकेटी घेतल्यो. अक्षर पटेल आनी रवी बिश्नोय हाणी दरेकी 2 विकेटी घेतल्यो. शिवम दुबेन एक विकेट आपल्या नांवार केली. अक्षर पटेलान मॅन ऑफ दी मॅच पुरस्कार फावो जालो. भारतान पयली टी-2- मॅच 6 विकेटीनी जिखल्ली.
रोहिताचो विक्रम
टी-20 आंतरराष्ट्रीय क्रिकेटीच्या इतिहासांत 150 मॅची खेळपी रोहित शर्मा संवसारांतलो पयलो क्रिकेटीयर थारलो. आतां मेरेन खंयच्याच क्रिकेटीयराक हे सुवात मेळोवपाक जमलें नाशिल्लें. भारताची अफगाणिस्ताना आडची बंगळुरूची तिसरी टी-20 मॅच टी-20 वर्ल्ड कपा पयलींची निमणी मॅच आसतली. ताका लागून रोहित शर्मा आनी विराट कोहली कडल्यान बऱ्या खेळाची अपेक्षा भारतीय क्रिकेट मोगींक आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
