भांगरभूंय | प्रतिनिधी
आयज संवसारीक म्होंवा मूस दीस. म्होंवा मूस फकत मनशां खातीर न्हय तर पुराय पर्यावरण यंत्रणे खातीर एक खूब म्हत्वाचो घटक.
आयज २० मे. आयज संवसारभर संवसारीक म्होंवा मूस दीस मनयतात. आंतोन जोन्सा हो संवसारीक नामनेचो म्होंवा मूस पालक. ताचो जल्म 20 मे 1734 दिसा स्लोव्हेनियांतल्या एका गरीब कुटुंबांत जालो. ताणें युरोपांतलें पयलें म्होंवा मूस पालन केंद्र १७६६ त सुरू केलें. १७७१ त ताणें म्होंवा मूस पोसपा विशींचें पयलें पुस्तक उजवाडायलें. तांच्या वावराक मान्यताय दिवन संयुक्त राश्ट्रांनी 20 मे दिसा संवसारीक म्होंवा मूस दीस म्हूण जाहीर केलो, जो 20 मे 2018 सावन सगले पाळटात.
ह्या दिसा म्होंवा मूस आनी किटक सांबाळपा खातीर जागृताय निर्माण जाता. म्होंवा मूस हो पर्यावरण यंत्रणेचो एक बरोच म्हत्वाचो घटक. तो जिणेक सगळ्यांत बरें वरदान. मधमाश्यांक समाजीक किटक म्हण्टात. म्होंवा मूस हेर किटकां भशेन एकटीं रावनात, पूण गटांत रावतात. तांच्या घराक मालें म्हण्टात. एका माल्यांत हजारांनी म्होंवा मूस आसतात. ते आपल्या खाणाक पूरक म्हूण फुलां पसून म्होंव आनी परागकण एकठांय करतात. म्होंवा मूस एका फुलांतल्यान दुसऱ्या फुलांत परागकण हस्तांतरीत करतात, ताका पोलिनेशन म्हण्टात. ताका लागून फुलांक बियो येतात. मागीर फुलां, फळां जातात. परागणाक लागून पिकाचें उत्पन्न 25 ते 30 टक्क्यांनी वाडटा, ताका लागून म्होंवा मूस शेतकारांक वरदान थारता हें शास्त्रज्ञांनी सिद्ध केलां. तरी लेगीत आमचे शेतकार म्होंवा मूस पोसपा विशीं अजून गंभीर नात. ताचे बदला म्होंवा मुसांचें मालें लासून मुसांक शेतांतल्यान धांवडावपाची तांची प्रवृत्ती आसता. एकदां शेतांत, बांदार आनी शेजरा सहजपणान दिसतालीं तीं म्होंवा मुसाचीं मालीं आतां दिसनात. म्होंवा खातीर मालें लासप, कीटकनाशकांचो फवारो मारप, मोबायल टाॅवर उबारप, म्होवां मुसां विशीं अज्ञान पातळावप.. हाका लागून म्होंवा मुसा सारकिल्ले उपेगी जीव नश्ट जावपाचे वाटेर आसात.
म्होंवा मूस नश्ट जाले जाल्यार ताचो पिकाच्या उत्पादनाचेर वायट परिणाम जावंक शकता, देखून आमी सगळ्यांनी ह्या म्होंवा मुसांची राखण आनी संवर्धन करपाक मुखार येवंक जाय. तांचे विशीं शास्त्रीय गिन्यान मेळोवन तांकां पोसपाचीं तंत्रां शिकूंक जाय. परागकण सगल्या पातळायिल्ल्यान शेतकी उत्पादन वाडटा देखून शेतकारांनी म्होंवा मूस पोसपाक प्राधान्य दिवचें, उत्पादन वाडप हें म्होंव आनी म्होंवा मुसाच्या मेणा परस चड म्हत्वाचें मानचें. हे विशीं सरकारानय शेतकारांक शिक्षण दिवचें. रोजगार निर्माण करपाची संद आशिल्ल्यान पूरक उद्देग म्हणून म्होंवा मूस पोसपाक जाय. तशें केल्यार गांवगिऱ्या वाठारांतल्या बेकार तरणाट्यांक रोजगार मेळूंक शकता.
म्होंवा मूस खूब म्हत्वाचें कार्य करतात. तांचे पसून खूब कितें शिकपाक मेळटा. एकवटान रावन आदर्श जिवीत कशें जगचें तें आमी म्होंवा मुसां कडल्यान शिकपाक जाय. रात दीस कश्ट करून म्होंव सारको गोड पदार्थ तयार जावंक शकता हें तांणी दाखोवन दिलां. म्होंवा मूस फकत मनशां खातीर न्हय तर पुराय पर्यावरण यंत्रणे खातीर एक खूब म्हत्वाचो घटक. आमी सगळ्यांनी म्होंवा मूस वांचोवन पर्यावरण वाटावपाचो प्रामाणीक यत्न केल्यारूच संवसारीक म्होंवा मूस दीस खऱ्या अर्थान अर्थपूर्ण जावंक शकता.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
