भांगरभूंय | प्रतिनिधी
भांगरभूंय । प्रतिनिधी
म्हापशेंः दिवाळखोरींत गेल्ल्या म्हापसा अर्बन सहकारी बँकेन म्हापशें शारांतली आपली मालमत्ता आशिल्ल्या इसार ट्रेड सेंटर इमारतींतली 30 तशेंच तळमाळी आनी दुसरे माळे वयली मेळून 26 धरून वट्ट 56 दुकानां पावणे वरवीं विकपाक काडल्यांत. बँकेचो लिक्विडेटर अँथनी डिसा हांणी पावणे खातीत नोटीस जारी केल्या
26 दुकांनी स्वतंत्रपणान जाल्यार 30 दुकानां लॉट पद्दतीन विकतले. 56 दुकांना पावणेक काडून बँक पयशे एकठांय करतली. इत्सुकांनी पावणे खातीर 20 सप्टेंबराक दनपारां 12 मेरेन अर्ज सादर करचे अशें लिक्विडेटरान कळीत केलां. कोणाक चडावत म्हायती जाय जाल्यार ताणी बँकेचो सरवेवस्थापक वा वसुली अधिकाऱ्या कडेन संपर्क सादचो अशें आवाहन केलां.
वयर नमूद केल्ल्या दुकानांचो बेकायदेशीरपणान ताबो घेतिल्ल्या वेवसायिकांक ऑक्टोबर 2021 मेरेन दुकानां रिकामी करपाचो आदेश बँकेन दिल्लो. हे संबंदीचो अहवाल नोंव्हेंबर मेरेन सादर करपाक लिक्विडेटरान सांगिल्लें.
म्हापसा अर्बन बँकेच्या सगल्या खातेदारांचे पयशे बँकेन परत दिल्यात. पांच लाखा परस चड रक्क्म हप्त्यांनी परत करतता. भारतीय रिझर्व बँकेन 15 एप्रिल 2020 बँक दिवाळखोरींत काडून लिक्विडेटराची नियुक्ती केल्ली. बँकेची कोट्यांनी रुपयांची मालमत्ता विकपाक काडून खातेदारांचें पयशे परत करपाची प्रक्रिया सुरू केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
