भांगरभूंय | प्रतिनिधी
म्हापशें: म्हापशें कोर्ट जंक्शना वयले पोरणें जाल्ले आपचलीत ट्राफीक सिग्नल्स सेगीत नादुरुस्त जायत आशिल्ल्यान म्हापशें पालिकेन नवे सिग्नल्स बसोवपाचो निर्णय घेतिल्लो. ते प्रमाण येता त्या आठ दिसां भितर हे नवे सिग्नल्स उबारतले. ते खातीर पाेरणें सिग्नल्स काडून उडयल्यात.
म्हापशें शारांतल्या ह्या मुखेल अशा कोर्ट जंक्शना वयले येरादारींत सुसुत्रताय हाडपा खातीर आनी येरादारीची कोंयडी आडावपा खातीर 10 वर्सां पयलीं आपचलीत ट्राफीक सिग्नल्स बसयिल्ले. सिग्नलाची ही यंत्रणा पोरणी जाल्ल्यान ते सेगीत इबाडटाले.
शारांतलें एक व्यस्त जंक्शन आसून ह्या वाठारातं न्यायालय, शाळा, म्हाविद्यालय, पालिका कचेरी, कोमुनिदाद प्रशासक कचेरी तशेंच हेर खाजगी आस्थापनां ह्या जंक्शन वाठारांत आसात. हे खातीर दीसभर हे सुवातेर वाहनांची गर्दी आसता.
सद्याच्या पलिका मंडळाच्या वर्सभराच्या काळांत सुमार पांच ते स फावटी ही यंत्रणा नादुरुस्त जाली. हे यंत्रणेंत सेगीत इबाड जावन वाहन येरादारीचेर परिणाम जायत आशिल्ल्यान हांगा नवे सिग्नल्स उबारपाचो निर्णय पालिका मंडळान घेतिल्लो.
ते प्रमाण पालिकेन सीएसआर (वेवसायीक समाजीक जापसालदारकी) येवजणे खाला एका खाजगी कंपनीक ह्या जंक्शनाचेर आतां नवे ट्राफीक सिग्नल्स यंत्रणा उबारतले. ह्या कंपनीचेर धा वर्सांच्या काळा खातीर देखरेखीची जापसालदारकी आसतली.
मजगतीं, नवे कंपनीक सिग्नल्स उबारपाची मान्यताय पालिकेन दिल्या. ताका लागून जंक्शना वयली पोरणी यंत्रणा काडून उडयल्या. सद्या येरादारी पुलीस कर्मचाऱ्यां वतीन हांगासरले येरादारीचेर नियंत्रण दवरतात.
कोर्ट जंक्शनार येता त्या आठ दिसां नवे ट्राफीक सिग्नल्स उबारतले. सीएसआर खाला शंक क्रिएशन ह्या कंपनी वतीन ही यंत्रणा बसयतले. फुडल्या धा वर्सां खातीर हे यंत्रणेची देखभाल लेगीत हीच कंपनी करतली अशी म्हायती नगराध्यक्षा शुभांगी वायंगणकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.