भांगरभूंय | प्रतिनिधी
पालिके कडेन हरकत ना दाखल्याचो प्रस्ताव
म्हापशें: हांगासरल्या फेररचणूक केल्ल्या पोरण्या पालिका तशेंच आताईद वाचपघर दायज इमारतींत डिजिटल लायब्ररी हें वाचपघर उबारपा खातीर कला आनी संस्कृती खात्यान म्हापशें पालिकेक हरकत ना दाखलो दिवपाची सुचोवणी केल्या. ह्या वाचपघरा खातीर कला आनी संस्कृती संचालनालयाच्या एका येवजणे खाला राज्य सरकारान निधीची तरतूद केल्या.
गोंय राज्य नागरी विकास एजन्सी वतीन (जीसूडा) सरकारान ह्या इमारतीच्या फेररचणुकेचें बांदकाम 2022 वर्सा डिसेंबर म्हयन्याच्या निमाण्या सप्तकांत हातांत घेतिल्लें. 3.80 कोटी रुपया खर्च करून हें काम करतात. हे खातीर कंत्राटदाराक स म्हयन्यांची मुजत दिल्ली. पूण ही मुजत वेळावेळार चुकली. आतां ऑक्टोबर-नोव्हेंबर म्हयन्यांत हें सुसज्ज अशें डिजिटल वाचपघर अस्तित्वांत येवपाची शक्यताय आसा. सद्या फेररचणुकेचें काम निमाण्या पांवड्यार आसून पाखें, तिजुल्या सयत हेर सिव्हील काम पुराय जावपा कडेन पावलां.
मजगतीं, ह्या पोरण्या आनी जिर्णावस्थेंत आशिल्ले इमारतीक वाचपघराचें स्वरुप दिवपाचो पालिकेचो प्रस्ताव फाटल्या कांय वर्सां सावन हुमकळत आशिल्लो.
इमारत मोडकुळेक आयिल्ल्यान फाटल्या 13 सप्टेंबर 2019 सावन ती बंद केल्ली आनी ताचे पसून फाटलीं पांच वर्सां आताईद वाचपघर बंद आसा.
ताचे पयलीं फाटल्या जानेवारी 2016 वर्सा पालिका कचेरेचें पाकल्यांचो ट्रॉप ह्या कोर्ट जंक्शना कडेन आशिल्ल्या दायज इमारतींत स्थलांतरण जायत सावन ही पोरणी इमारत वापर नासतना पडून आशिल्ली. फक्त तळ माळ्यार आताईद वाचपघर सुरू आशिल्लें. पूण देखभाल नाशिल्ल्यान ही इमारत जीर्ण जावन मोडकुळेक आयिल्ल्यान ही इमारत पुरायपणान बंद केल्ली.
पयलीं हांगा जिल्हो वाचपघर सुरू करपाचो प्रस्ताव पालिका मंडळाचो आशिल्लो. पूण कला आनी संस्कृती खातें आनी पालिका हांचे मदीं समजिकायेचे कबलातींत समस्या निर्माण जाली आनी हांगा डिजिटल वाचपघर सुरू करपाचो निर्णय पालिका मंडळान घेतिल्लो. ते प्रमाण जीसुडान इमारतीच्या फेररचणुकेचें काम हातांत घेतिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
