भांगरभूंय | प्रतिनिधी
म्हापशें, प्रतिनिधी ः म्हापश्यां एका चोरान चार दुकानां फोडलीं. ते उपरांत एका हॉटेलाचो काउंटर लासलो आनी उपरांत तो थंयच न्हिदलो. सकाळीं कामगारांनी हॉटेल उगडलें तेन्ना तांकां न्हिदिल्लो हो चोर मेळ्ळो. चंदन हरिहर दास (18, बिहार) अशें ह्या चोराचे नांव. मजगतीं, आदल्या दिसा दुसऱ्या एका हॉटेलांत भितर सरून फ्रिजांतल्यान बांगडो काडून चोरान भाजून खाल्ल्याचे उक्तें जाला
ही घडणुक म्हापाश्यां बाजारांत आयज सकाळीं सुमार साडेपांच वरांचेर उजवाडाक आयली. दुबावीत चोर ‘शांतदुर्गा’ हॉटेला भायर आशिल्ल्या उदकाच्या टांकयें वयल्यान रोहिणी ब्युटी पार्लरांत भितर सरलो. थंय ताका कांयच मेळ्ळें ना. देखून रागान ताणें तातूंतलें सामान जाळ्ळें. पार्लराचें लुकसाण केल्या उपरांत तो वयल्यान शांतादुर्गा हॉटेलांत देंवलो. हॉटेलाच्या काउंटरांत रोख रक्कम नाशिल्ल्यान ताणें ताकाय उजो लायलो आनी सीसीटीव्ही कॅमेरेय मोडले आनी तो हॉटेलांतच न्हिदलो. सकाळीं कामगारांनी हॉटेल उगडलें तेन्ना दुबावीत भितर न्हिदिल्लो. कामगारांनी ताका धरलो आनी उपरांत हॉटेलाचो धनी स्वप्नील पेडणेकाराक आपयलो. तशेंच ताणें पुलिसांक कळयलें आनी ताका पुलिसांच्या ताब्यात दिलो.
मजगतीं, आयतारा 18 तारखेक एका दुबावितान हॉटेल समाधान, सम्मान हॉटेल आनी बाजारांतल्या हेर दुकानांनी चोरी केल्ली. थंय दुबावितांक ल्हान रोख रक्कम मेळ्ळी. संतोष बेळेकाराच्या ‘समाधान’ हॉटेलाच्या फ्रिजांत दवरिल्लो बांगडो काडून ताणें थंयच तो भाजून खाल्लो.
हे घडणुके उपरांत म्हापश्यां ट्रेडर्स असोसिएशनाचे अध्यक्ष श्रीपाद सावंत, सचीव सिध्देश राऊत, खजिनदार जितेंद्र फळारी आनी पांडुरंग सावंत हांणी पुलीस उपअधीक्षक जीवबा दळवी आनी निरिक्षक सीताकांत नायक हांकां मेळून निवेदन सादर करून बाजारांत घडपी चोरी आनी हेर प्रकार थांबवपाची मागणी केली. पुलीस गस्त वाडोवन गरजेची दक्षता जातली अशें उपअधीक्षक दळवी हांणी प्रतिनिधी मंडळाक आश्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
