भांगरभूंय | प्रतिनिधी
पालिके वतीन कर्मचाऱ्यांचे पांच पंगड; दोन म्हयन्यांत जातलें काम पुराय
भांगरभूंय । प्रतिनिधी
म्हापशें: म्हापशें पालिका वाठारांतलीं घरां आनी वेवसायीक आस्थापनांचें पुनर्मुल्यांकन करपाची मोहीम बिरेस्तार सावन हातांत घेतले. 1 डिसेंबर ते 31 जानेवारी ह्या दोन म्हयन्यांच्या काळांत हें पुनर्मुल्यांकन करतले. ते खातीर 10 कर्मचारी आशिल्ले पांच पंगड नेमल्यात.
पालिकेन शारांतलीं घरां, हेर वेवसायीक आस्थापनां आनी बांदकामांचें पुनर्मुल्यांकन फाटलीं आठ वर्सां करूंक ना. सध्या पालिका वाठारांत 20 प्रभाग आसात. पूण पुनर्मुल्यांकन जावंक नाशिल्ल्यान पालिकेचें कामकाज आदल्या 13 प्रभागां वयल्यानूच चलता.
नगरपालिका कायदो 1968 च्या 120 कलमा खाला दर चार वर्सांनी घरपटी कराचें पुनर्मुल्यांकन करपाची तजवीज आसा. हे तजविजेच्या आदारान म्हापशें पालिका मंडळान घरपटीचें पुनर्मुल्यांकन करपाचो निर्णय घेतला आनी ताची कार्यवाही बिरेस्तार 1 डिसेंबर सावन जातली.
ह्या पुनर्मुल्यंकना खातीर पांच पंगडांची नेमणूक केल्या. प्रभाग 1 ते 4 त प्रकाश कांबळे आनी संतोष केरकार, प्रभाग 5 ते 8 त मनोहर कांबळे आनी रमेश राव, प्रभाग 9 ते 12 त नागेश पुजारी आनी संदीप कांबळे, प्रभाग 13 ते 16 त चनाप्पा होलेप्पान्नावर आनी आरीफ मदार, प्रभाग 17 ते 20 त असोक कांबळे आनी महेश विर्नोडकार ह्या कर्मचाऱ्यांचो ह्या पंगडांत आसपाव आसा.
सध्या पालिका पालिका वाठारांतली लोकसंख्या 40 हजारां परस चड आसा. जाल्यार अंदाजी घरांची संख्या 30 हजारां मेरेन पावल्या. तातूंतलीं सुमार 5-8 हजार घरां बेकायदो आसात. ह्या सगळ्यांचें हे मोहिमेंत पुनर्मुल्यांकन जातलें. ही मोहीम पुराय जाले उपरांत पालिका वाठारांतल्या घरांचो अचूक आंकडो स्पश्ट जातलो. सध्या पालिका मंडळा कडल्यान नळ्यांचीं आनी मातयेच्यो वण्टी आशिल्ल्या पोरण्या आनी नव्या घरांक 1.75 रुपया जाल्यार काँक्रिटाच्या घरांक 4.40 रुपया दर चौखण मिटर दरान घरपटी वसूल करतात. जाल्यार वेवसायीक आस्थापनांनी काँक्रिटाचीं दुकानां, घरां आनी गुदांव हांकां 17.70 रुपया दर चौखण मिटर, नळ्यांचीं घरां, हॉस्पिटल, सभाघर, दुकानां, घरां, गुदांव आनी उद्देगीक वसणूक हांकां 8.85 रुपया दर चौखण मिटर दरान घरपटी घेतात.
पालिका कायद्या प्रमाण निर्णयः मुख्याधिकारी
नगरपालिका कायद्या प्रमाण आमी पालिका वाठारांतलीं घरां आनी आस्थापनांच्या पुनर्मुल्यांकन करपाचो निर्णय घेतला. बेकायदो घरां आनी आस्थापनांच्यो नोंदी लेगीत तातूंत आसतल्यो. दोन म्हयने ही मोहीम चलतली. तातूंत मेळिल्ल्या डाटाचो अभ्यास करून आनी पालिका मंडळाची मान्यताय घेवन एप्रील 2023 सावन सुदारीत घरपटी दर घेवपाची मोख आमी दवरल्या. तशेंच पालिकेचें कार्यकालीन कामकाज लेगीत 20 प्रभागा प्रमाण सुरू करतलें, अशी म्हायती पालिका मुख्याधिकारी अमितेश शिरवयकार हांणी दिली.
2017 घेतिल्लो पुनर्मुल्यांकनाचो थाराव
4 जुलय 2017 ह्या दिसा तेन्नाच्या पालिका मंडळान घरपटी कराचें पुनर्मुल्यांकन करपाचो थाराव घेतिल्लो. त्या वेळार असो निर्णय घेवपी म्हापशें पालिका गोंयांतली पयली पालिका थारिल्ली. पूण ह्या निर्णयाची कार्यवाही मात जावंक नाशिल्ली. त्या वेळार लेगीत पालिका मंडळान हेर थारावा वरींच पुनर्मुल्यांकनाचो निर्णय घेवन आपणाकूच शाबासकी दिवपाचो यत्न केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
