भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशेंच्या पालिकेच्या मार्केट सोपो कंत्राटदारा कडल्यान आमी हप्तो वा खंडणी केन्नाच मागली ना. कंत्राटदारान केल्ल्या ह्या आरोपाची चवकशी जावपाक जाय. आमी दक्षता खातें वा हेर खंयचेय यंत्रणेन चवकशी केल्यार तिका तोंड दिवपाक तयार आसात अशें हे हप्तो प्रकरणांत नांव घेतात त्या म्हापशें पालिका मंडळांतल्या (एमएमसी) तीन नगरसेवकांनी सांगलां.
शुक्राराक सांजे एक पत्रकार परिशद घेवन नगरसेवक विराज फडके, स्वप्नील शिरोडकार आनी आशिर्वाद खोर्जुवेकार हांणी तांचेर केल्लो आरोप न्हयकारलो. मार्केट सोपो कंत्राटदारान केल्ल्या आरोपांत कांयच तथ्य ना. प्रसिद्धी खातीर केल्लो हो स्टंट आसा अशें मार्केट समितीचो अध्यक्ष आशिल्ल्या विराज फडकेन सांगलें. पालिका मुख्याधिकाऱ्यान वेपाऱ्यां कडल्यान चड सोपो कर घेता म्हणून धाडिल्ले कारणा दाखय नोटिशीक जाप दितना सोपो कंत्राटदारान तीन नगरसेवकांची नांवां घेवन तांणी आपले कडेन म्हयन्याक 2 लाख रुपयांचो हप्तो मागिल्लो असो दावो केल्लो. तिनूय नगरसेवकांनी हो आरोप न्हयकारला.
कंत्राटदारान चड बोली लावन सोपो कर एकठांय करपाचें कंत्राट मेळयल्लें. आतां कंत्राटा प्रमाण पयशें जमा जायनात म्हणून तो आमचेर फटीचे आरोप करता अशें विराज फडकेन सांगलें. ते खातीर आमी अब्रू लुकसाणेची केस न्यायालयांत करतले अशें तांणी सांगलें. आमी हप्तो मागिल्ल्याचो पुरावो आसल्यार कंत्राटदारान तो पुलीस वा दक्षता खात्याक सादर करचो. आमी कसलेय चवकशेक तयार आसा अशें स्पश्ट करून आमचेर केल्ल्या आरोपा फाटल्यान राजकारण आसा काय ताचे फाटल्यान कोण आसा हें आमकां खबर ना अशें तांणी सांगलें.
म्हजो वेवसाय भेस बरो चल्ला. अर्थीक स्थिती बरी आशिल्ल्यान सोपो कंत्राटदारा कडल्यान पयशे घेवपाची म्हाका कसलीच गरज ना अशें आशिर्वाद खोर्जुवेकारान सांगलें. हांव मार्केट समितीचो वांगडी नासतना म्हजें नांव कारण नास्तना घेतलां अशें स्वप्नील शिरोडकारान सांगलें. मजगतीं, सोपो वा पार्किंग कंत्राट मसुद्यांत कांय त्रुटी आशिल्ल्यान तो परत तयार करचो पडटलो. सोपो कर घेतल्या उपरांत छापील पावती दिवपाक जाय. मुख्याधिकाऱ्या कडेन हे विशीं चर्चा करून निर्णय घेतले. फुडाराक अतिरिक्त पयशे घेवपाचो प्रश्न उप्रासचो न्हय म्हणून ही उपाय येवजण करप गरजेचें आसा, अशें विराज फडके हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
