भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिका मंडळाच्या मार्केटांतले वेंडीग विभाग, भाडेंपट्टी कबलात, पार्किंग, अतिक्रमण आनी कोयराची समस्या टप्पाटप्प्यान सुटावी करपाचें आस्वासन मुख्याधिकारी अमितेश शिरवयकारान मार्केट वेपारी संघटनेक दिलां. सोमाराक सांजे वेपारी संघटना आनी पालिका मंडळाची बसका जाली. नगराध्यक्ष शुभांगी वायंगणकार, मार्केट समितीचो अध्यक्ष विराज फडके, वेपारी संघटनेचो अध्यक्ष श्रीपाद सावंत, पदाधिकारी आनी नगरसेवक ह्या वेळार हाजीर आशिल्ले.
वेपाऱ्यांनी आपल्या कोयराचें वर्गीकरण करून तो पालिका कामगारां कडेन दिवचो अशी मागणी पालिका मंडळान केली जाल्यार वेपाऱ्यांक आपल्यो दुचाकी दवोरपाक सुवात आरक्षीत करची, मार्केटांत आपलो म्हाल विकपाक येवपी लोक मेकळी सुवात आडयतात. ताका वळखपत्रा दिवचीं आनी वेंडीग समिती स्थापन करपाची मागणी वेपारी संघटनेन केली. भाडेपट्टी कबलातीचें नूतनीकरण करपा खातीर खासा कर्मचाऱ्यांची नेमणूक करपाची मागणी संघटनेन केल्या. हे संबंदीच्यो फायली कालबद्द पद्दतीन निकालांत काडपाचें उतर मुख्याधिकाऱ्यान तांका दिलां.
मार्केटांत माल दवोरपा खातीर दुकानदारांक 60 सेंटिमीटर सुवात दिल्या. ताचे परस चड सुवातेर केल्लें अतिक्रमण काडपाची मोहीम हातांत घेवले अशें मुख्याधिकाऱ्यान सांगलें. पालिका मंडळान पयलेच फावट आमच्यो समस्या आयकून घेवपा खातीर बसकेक आपयल्लें अशें वेपारी संघटनेचो सचीव सिद्धेश राऊत हांणे सांगलें. अतिक्रमणां काडपाची मोहीम फुडल्या वर्सा सावन हांतांत घेतले अशें मुख्याधिकारी शिरवयकारान पत्रकारांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
