म्हापशें बंद रद्द

भांगरभूंय | प्रतिनिधी

म्हापशेंः नितळसाण शुल्का सयत म्हापशें वेपारी संघटनेच्यो चारुय मागणी पालिकेन मुख्यमंत्री डॉ. प्रमोद सावंत हांचे कडेन जाल्ले बसकेंत मान्य केल्यात. देखून वेपारी संघटणेन सोमारा 23 जूनाक म्हापशें बंद आंदोलन सध्या खातीर स्थगीत केला. हे संबंदी निर्णय वेपारी संघटणा सांजवेळार जाहीर करतले.
म्हापशें पालिकेन नितळसाण शुल्क पांच वर्सा परस 2025-26 वर्सा ह्या एक वर्सा सावन लागू करचो, नितळसाण शुल्काच्या श्रेणी दरांत सुदारणा करची. नितळसाण शुल्क भरिल्ल्यांचें चार वर्सांचें पयशे परत करचे आनी वेपार परवान्याचें नूतनीकरण करतना उशीराची फी घेवची न्हय. ह्यो चार मुखेल मागण्यो हे संघटनेन पालिके मुखार मांडल्यो.
पूण परत परत फालोअप जाले तरी पालिका मुखेल अधिकारी आनी थळाव्या आमदारांकडल्यान ठोस आश्वासन मेळूंक ना. ते खातीर म्हापशें वेपारी संघटणेन म्हापशें बाजारा सयत 23 जून दिसा शार भर बंद करपाचो उलो मारिल्लो.
हे फाटभुंयेर मुख्यमंत्री डॉ. प्रमोद सावंत हांणी म्हापशें वेपारी संघटणेक चर्चा करपाक आपयल्लें. शेनवारा, 21 तारखेक दनपारां पणजेच्या मुख्यमंत्री बंगल्यांत मुख्यमंत्र्यां बरोबर बसका जाली. ह्या वेळार उपसभापती जोशुआ डिसोझा, म्हापशें वेपारी संघटनेचो अध्यक्ष जितेंद्र फळारी, सरचिटणीस सिद्धेश राऊत, खजिनदार राजेश गावस, उपाध्यक्ष अनीश जोशी आनी नगरपालिका मुखेल अधिकारी चंद्रकांत शेटकार हाजीर आशिल्ले. पूण हे बसकेंत पालिकेचे मुखेली आशिल्ल्या नगराध्यक्षाक आपोवंक ना.
वेपारी संघटनेच्या शिश्टमंडळान आपल्यो मागण्यो सविस्तरपणान मुख्यमंत्र्या मुखार मांडल्यो. मुख्यमंत्र्याच्या सुचोवण्यां प्रमाण पालिका मुखेल्यान संघटनेच्यो वयल्यो सगळ्यो मागणी मान्य केल्यो.
मुख्यमंत्री डॉ. प्रमोद सावंत आनी आमदार जोशुआ डिसोझा हांणी मध्यस्थी करून आमच्यो मागण्यो मान्य केल्यात. ते खातीर मुख्यमंत्री आनी आमदारांचे उपकार मानून आनी 23 जून म्हापशें बंद उलो फाटीं घेता अशें वेपारी संघटनेचे अध्यक्ष जितेंद्र फळारी आनी सरचिटणीस सिध्देश फळारी हांणी प्रसार माध्यमां कडेन उलयतना जाहीर केलें.
आयज आमची मुख्यमंत्र्या कडेन संयुक्त बसका जाल्ली. हे बसकेंत म्हापशें वेपारी संघटनेच्यो सगळ्यो मागण्यो मान्य केल्यात. अशें उपसभापती जोशुआ डिसोझा हांणी सांगलें.