भांगरभूंय | प्रतिनिधी
पालिका बसकेची मागणी पत्रां विशींची नोटीस आयज येवपाची शक्यताय
भांगरभूंय । प्रतिनिधी
म्हापशें: म्हापशेंच्या पालिका कर्मचाऱ्यांच्या चार्टर ऑफ डिमांड पत्राचेर निर्णय घेवचे खातीर पालिके कडल्यान पालिका मंडळाच्या बसकेची नोटीस मंगळारा काडपाची शक्यताय आसा. तशेंच हे विशीची म्हायती दिवपी पत्र कामगार आयुक्तांक धाडटले. पालिकेक सगाय्यक कामगार आयुक्तांक 18 ऑक्टोबर मेरेन कर्मचाऱ्यांच्या मागणी पत्राचेर निर्णय घेवपाची मुजत दिल्या.
पालिका कर्मचाऱ्यांच्या 19 कलमी मागणी पत्राचे पुर्तते खातीर 21 सप्टेंबर 2022 ह्या दिसा अखील गोंय पालिका कर्मचारी संघटणे वतीन पालिकेक नोटीस जारी केल्ली. मागणी पत्राक मंजुरी दिली ना जाल्यार 10 ऑक्टोबर सावन बेमुजत संप करतले, अशी शिटकावणी दिल्ली. ते भायर हेरसंबंदितांक हे नोटिशेची प्रत धाडिल्ली. तरी लेगीत पालिकेन कसलेंच पावल उखलूंक नाशिल्लें. हाचो निशेधघ म्हूण पालिका कर्मचाऱ्यांनी 3 ऑक्टोबरा सावन हाताचेर काळी पट्टी बांदून कामार येवपाचें आनी जेवणाच्या वेळार पालिका कार्यालया मुखार निदर्शना करपाची कार्यावळ हातांत घेतल्या.
मजगतीं, 7 ऑक्टोबराक पालिका कर्मचारी संघटणेच्या मागणीपत्राच्या संबंदीत नोटिशेचेर सहाय्यक कामगार आयुक्तां मुखार सुनावणी जाल्ली. त्या वेळार आयुक्तान ह्या मागणी पत्राचेर निर्णय घेवचे खातीर 18 ऑक्टोबर मेरेनची मुजत पालिकेक दिल्ली. तशेंच फुडली सुनावणी 19 ऑकेटबराक निश्चीत केल्ली. पूण अजून दिल्ले मुजतींत पालिका मंडळान बसका घेवन ह्या मागणी पत्राचेर निर्णय घेवंक ना.
पालिका सुत्रां कडल्यान मेळिल्ले म्हायती प्रमाण ह्या मागणी पत्राचेर निर्णय घेवचे खातीर पालिका मंडळाची बसका घेवप गरजेचें आसा. पालिकेक विशेश बसका घेवचे खातीर दोन दीस आगावू नोटीस काडची पडटा. जाल्यार साबार बसकेची नोटीस आठ दीस आदीं काडची पडटा. ताका लागून पालिका मंडळा कडल्यान साबार बसकेची नोटीस मंगळारा कामगार आयुक्तान दिल्ले मुजतीच्या निमाण्या दिसा काडटले. तशेंच हे विशीची कल्पना दिवपी पत्र लेगीत मंगळाराच आयुक्तांक धाडटले.
आयचें मरण फाल्यांर…?
कर्मचाऱ्यांच्या मागणी पत्राचे पुर्तते खातीर अजून कांय वेळ मेळचो, तशेंच दिवाळीचो सण कसलेच आडखळी बगर मनोवपाक मेळचो, हे खातीर कामगार आयुक्तांचे मुजतीच्या निमाण्या दिसा पालिका मंडळाचे बसकेची नोटीस काडपाचें पालिका मंडळान थारायलां. बसकेची नोटीस काडून फुडले काय दीस कर्मचाऱ्यांच्या संपाची माथ्यार हुमकळपी तरसाद स्थगीत दवरपाची पालिका मंडळाची युक्ती आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
