भांगरभूंय | प्रतिनिधी
म्हापशें: हांगासरल्या न्हंयेच्या पात्रांत परतून वॉटर हायसींथ ही जलपर्णी परतून नेटान वाडूंक लागल्या. वेळारूच उदका स्रोत खात्यान तशेंच संबंदितांनी उपाय काडलो ना जाल्यार न्हंयेच्या पात्राचेर परतून एकदां संकश्ट येवपाची शक्यताय उप्रासल्या.
म्हापशें न्हंयेंत गिरी ते मयडें पूल मजगतीं फाटल्या कांय वर्सां पयलीं व्हड प्रमाणांत जलपर्णी किल्लली. हाका लागून न्हंयेचें पात्र अदृश्य जाल्लें. थळावे तशेंच नुस्तेमारांनी वेळावेळार हाचेर म्हापशें पालिका मंडळ, बस्तोडें आनी गिरी पंचायत तशेंच उदका स्रोत आनी कॅप्टन ऑफ पोर्टस खातें आनी लोकप्रतिनिधींचें लक्ष्य ओडिल्ल्यान निमाणें म्हापशें पालिका आनी मयडें वाठारांतल्या कांय समाजीक संस्थांच्या यत्नांक लागून उदका स्रोत खात्यान ह्यो जलपर्णी काडपाचें काम हातांत घेतिल्लें.
फाटल्या जून-जुलय 2022 वर्सा उदका स्रोत खात्यान खास मशिनी वरवीं ह्यो जलपर्णी न्हंयेच्या पात्रांतल्यान काडून उडयिल्ल्यो. पूण ह्या वेळार जलपर्णीचें मूळ नश्ट करूंक नाशिल्ल्यान परतून ताणें तकली वयर काडल्या.
सद्या न्हंयेंतल्या तार पुलाच्या दोनूय वटांनी ह्यो वनस्पती व्हांवून वतना तशेंच न्हंयेच्या पात्रांत आडकल्ल्याचें दिसूंक लागल्यात. हाचेर रोखडोच उपाय काडलो ना जाल्यार पयली भशेन परिस्थिती निर्माण जातली अशी भिरांत थळाव्यांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
