भांगरभूंय | प्रतिनिधी
मातयेचो भराव उडोवपी ट्रक चालकाक अटक
म्हापशें: तार- बस्तोड्यां म्हापशेंचे न्हंयेंत टाकावू मातयेचो भराव उडोवपी ट्रक म्हापशें पुलिसांनी जप्त केलो. तशेंच ट्रक चालक दुर्गाप्पा चव्हाणाक अटक केली. हे न्हंयचेर बेकायदो अतिक्रमणां आड संबंदीत सरकारी यंत्रणा कडेन कागाळ करतले अशें आमदार अॅड. कार्लुस फेरेरा हांणी सांगलें.
काल (आयतारा) दनपारां 12 वरांचेर न्हंयेच्या पात्रांत टाकावू फातर आनी माती उडोवपी ट्रक आदले नगरसेवक दीपक म्हाडेश्री हांचे नदरेक आयलो. रोखडीच तांणी घडणूक थळार धांव घेवन हो प्रकार आडायलो. हे विशीं ट्रक चालका कडेन विचारपूस केली तेन्ना संबंदीत चालक ट्रक थंयच दवरून पळ काडलो.
उपरांत म्हापशें पुलिसांचो पंगड आनी आमदार अॅड. फेरेरा घडणूक थळार दाखल जाले. पुलिसांनी ट्रक जप्त केलाे आनी उपरांत ट्रक चालक दुर्गाप्पा चव्हाण हाका प्रतिबंधक कारवाये खाला अटक केली.
दीपक म्हाडेश्री हांणी म्हणलें, सरकारी यंत्रणा आनी लोकप्रतिनिधींनी न्हंयेंत उडोवपी मातयेच्या भरावाचे प्रकार आडावपाक जाय. पयलींच ही न्हंय उथळ जाल्ली आसून तातूंत मातयेचो भराव उडोवन अतिक्रमण केल्यार देगे वेल्या भागाचेर विपरीत परिणाम जातलो.
आमदार अॅड. कार्लुस फेरेरा हांणी म्हणलें, न्हंयेचो वाठार ही सरकाराची मालमत्ता आसा. ताचेर कसलेंच तरेचें अतिक्रमण अवैद्य आसा. अशे तरेन न्हंयेचें पात्र पुरोवप चुकीचें आसून हें अतिक्रमण करपी लोकांनी समजून घेवंक जाय. जर न्हंयेचें पात्र अशीर जायत जाल्यार ताचो सैमीक प्रवाहाचेर परिणाम जातलो आनी हुंवार येतलो.
हांव हे विशीं पुलीस निरिक्षका कडेन उलयलां. पुलिसांनी ट्रक जप्त केला. महसूल, न्हंय येरादारी, बंदर कप्तान हांचे सयत नगर नियोजन खात्या कडेन हे विशीं कागाळ करतले आनी आवश्यक ती कारवाय जातली हाची दक्षता घेवं अशें अॅड. फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
