भांगरभूंय | प्रतिनिधी
उपनगराध्यक्ष चंद्रशेखर बेनकार प्रभारी नगराध्यक्ष; 23 जानेवारीचे बसके विशीं दुबाव
भांगरभूंय । प्रतिनिधी
म्हापशें: म्हापशेंची नगराध्यक्ष शुभांगी वायंगणकार हांचो राजिनामो स्विकृत जाल्ल्यान हें पद रितें जालां. पालिका संचालकान बुधवारा सांजे उसरां मेरेन ह्या रिक्त पदाचो पदभार उपनगराध्यक्षा कडेन दिवंक नाशिल्लो. पद रिक्त जावच्या आदल्या दिसा नगराध्यक्षान 23 जानेवारीक आपयिल्ले विशेश बसके विशीं दुबाव निर्माण जाला.
मजगतीं, म्हापशें नगराध्यक्षाचो राजिनामो ग्राह्य जाल्ल्यान उपनगराध्यक्ष चंद्रशेखर बेनकार हांणी बिरेस्तारा ह्या पदाचो ताबो घेतलो.
बुधवारा 11 जानेवारीक शुभांगी वायंगणकार हांणी नगराध्यक्षपदाचो राजिनामो पालिका संचालकां कडेन सादर केल्लो. हें राजिनामो पत्र बुधवारा 18 जानेवारीक सकाळीं स्विकारिल्ल्याची म्हायती पालिका संचालक गुरुदास पिळर्णकार हांणी दिली. ताका लागून नगराध्यक्षपदा वयल्यान वायंगणकार हांकां देंवचें पडलां. तरी लेगीत तांणी बुधवारा सकाळीं नगराध्यक्षपदाचें कदेल सोडूंक नाशिल्लें. तशेंच दीसभर तांणी नगराध्यक्षाची गाडी घेवन शारांत पासय मारिल्ली.
मजगतीं, नगराध्यक्षान मंगळारा सांजे वेळार शिगमो उत्सव आनी कार्नावाल उत्सवाच्या आयोजना संबंदांत बसका घेवपाचो निर्णय घेवन 23 जानेवारीक सकाळीं 11 वरांचेर पालिका मंडळाचे विशेश बसकेचें पत्र उसरां नगरसेवकांक दिलें. प्रत्यक्षांत तांचें राजिनामो पत्र ग्राह्य धरतलें, हे खबर आसून लेगीत तांणी ही बसका आयोजीत केल्या.
पालिका कायद्या प्रमाण हो प्रकार बेजापसालदार आनी घाळपणाचो आसा. पालिका मुख्याधिकाऱ्यान लेगीत ह्या प्रकाराक हरकत घेवंक ना. ताका लागून पालिकेच्या एकंदरीत कारभाराचेर प्रस्नचिन्न निर्माण जालां.
प्रिया मिशाळ काय नूतन बिचोलकार?
नगराध्यक्षाचे सर्तींत सत्ताधारी गटांतली प्रिया मिशाळ आनी नूतन बिचोलकार आसात. 20 नगरसेवकांतले 14 नगरसेवक सत्ताधारी गटा कडेन आसात. नवो नगराध्यक्ष वेंचून काडपा खातीरची नोटीस जारी जाल्या उपरांतूच सत्ताधारी गट आनी भाजपा फुडाऱ्यां कडल्यान नगराध्यक्षपदाचो उमेदवार थारतलो, अशी म्हायती सुत्रांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
