भांगरभूंय | प्रतिनिधी
भांगरभूंय । प्रतिनिधी
म्हापशेंः सत्ताधारी म्हापशें पालिका मंडळातले तीन नगरसेवक आपल्या कडेन हप्ते मागतात अशी जाप मार्केट सोपो कंत्राटदारान पालिका मंडळान दिल्ले कारणा दाखय नोटिशेक दिल्ल्यान हे प्रकरण गंभीर आशिल्ल्यान ताची पुलिसां वरवीं चवकशी करपाची मागणी पालिकेंतल्या विरोधी पंगडान केल्या. ते खातीर ताणी मुख्याधिकारी अमितेश शिरवयकारान एक निवेदन भेटयलां.
ह्या निवेदनाचेर सुधीर कांदोळकार, शशांक नार्वेकार, कमल डिसोझा, आनंद भाईडकार हांच्यो सयो आसात. सोपो कंत्राटदार चड पयशे वसूल करता अशें विक्रेत्यांचें म्हणणे आशिल्ले. कांय नगरसेवकांनी मुख्याधिकाऱ्यांचे नदरेक ही गजाल हाडून दितकूच तांणी कंत्राटदाराक कारणे दाखय नोटीस दिल्ली. ताका जाप दितना तीन नगरसेवक म्हयन्याक 2 लाख रुपया दिवपाक सागतात अशें कत्राटदारान सांगलें.
ही गजाल उक्ताडार येतकूच विरोधी पंगडांतल्या नगरसेवकांनी पुलिसां वरवीं चवकशी करपाची मागणी केल्या. सोपो कंत्राटदार चड पयसे वसूल करता हातूंत तथ्य आसा. कोणूच लांच मागता जाल्यार कंत्राटदाराक पुलीस व संबंदीत यंत्रणेकडेन वचपाची मेकळीक आसा, अशें मुख्याधिकारी शिरवयकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
