भांगरभूंय | प्रतिनिधी
2 अजुनूय व्हरपाची पळयतात वाट; ‘भांगरभूंय’न दिल्ली खबर
म्हापशें: उत्तर गोंय जिल्हो हॉस्पिटल वाठारांत बेवारशी स्थितींत पार्क केल्ल्या 10 मोटारी मदल्याे 8 मोटरी संबंदितांनी व्हेल्यो. जाल्यार दोन मोटारी अजून हॉस्पिटलाच्या तळ माळ्यार पार्किंगेचे सुवातेंत पडून आसात.
फाटल्या खूबशा म्हयन्यां सावन ह्यो मोटरी हॉस्पिटलाच्या प्राकारांत दवरून पार्कींग थळाचो कांय लोकांनी गैरफायदो घेतिल्लो. हे विशीं भांगभूंयन बुधवारा खबर दिल्ली. हे खबरेची दखल घेवन मोटार धनयांनी बुधवारा रातींच मोटारी व्हरून सुवात मेकळी केली.
ह्या वाहनांक लागून हॉस्पिटलाचे सुरक्षेचो प्रस्न निर्माण जाल्लो. दुयेंतींक तशेंच हॉस्पिटलाच्या अधिकाऱ्यांक आनी कर्मचाऱ्यांक तांची वाहनां पार्क करपा खातीर इमारतीच्या प्राकारांत ही पार्किंगेची वेवस्था केल्या. पूण हे सुवातेर आशिकुशीचे लोक तशेंच कांवला अड्डेकार आपल्यो मोटारी पार्क करताले. फाटल्या कांय म्हयन्यां सावन हो प्रकार सेगीत चलतालो.
हो प्रकार समजतकूच हॉस्पिटलाच्या अधिकाऱ्यांनी बेवारशी गाडयांची सुरक्षा रक्षका वतीन सर्वे करून नोंद केल्ली. ह्या गाडयांच्या क्रमांका सयत तपशील हॉस्पिटला वतीन येरादारी पुलीस अधिक्षकां कडेन सादर केल्लो आनी कारवायेची विनंती केल्ली. पूण हे कारवाये पयलींच आठ मोटार धनयांनी आपल्यो मोटारी व्हेल्यो.
जिल्हो हॉस्पिटलाच्या पार्कींग थळार खूबशे म्हयने दवरिल्ल्यो 10 मोटार गाडयां मदल्या 8 मोटार धनयांनी स्वता जावन मोटारी काडल्यो. उरिल्लीं दोन वाहनां व्हेली नात जाल्यार वाहनांचेर येरादारी पुलीस कारवाय करतले. हे संबंदी येरादारी पुलीस अधिक्षकांक पत्र बरयलां अशी म्हायती हॉस्पिटलाच्या अधिकाऱ्यांनी दिली.
जिल्हो हॉस्पिटलाच्या प्राकारांत पार्क केल्ल्या कर्मचाऱ्यांच्या गाडयांची चोरी जावपाच्यो घडणुको घडल्यात. मोटार, दुचाकी चोरयेक गेल्ल्यो. तशेंच कांय पार्क केल्ल्याे गाडयो हेर वाहनांक आडमेळीं थारताल्यो. हे फाटभुंयेर हॉस्पिटलाच्या पार्कींग थळांतल्या गाडयांची पळोवणी केल्ल्यान ह्या बेवारशी वाहनांचो प्रकार मुखार आयिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
