म्हापशेंच्या श्री बोडगेश्वराची जात्रा

भांगरभूंय | प्रतिनिधी

भांगराचो दांडो श्रींच्या चरणां कडेन करतले अर्पण

म्हापशें ः म्हापशेंचें जागृत देवस्थान आशिल्ल्या श्री देव बोडगेश्वर संस्थानाची 88 वी जात्रा आनी 30 वो वर्धापन दीस ता. 4 ते 15 जानेवारी मजगतीं मनयतले. 

  बुधवार ता. 4 जानेवारीक श्री देव बोडगेश्वरांच्या मुर्ती प्रतिश्ठापनेच्या 30 व्या वर्धापनदिसा निमतान सकाळीं 10 वरांचेर धर्मीक विधी सुरू जातल्यो. उपरांत दनपारच्या 12 वरांचेर भांगराचो दांडो श्रींच्या चरणां कडेन अर्पण करतले. ह्या वेळार चंद्रशेखर सिंग आनी सागर माने हांच्या बॅण्ड पंगडा वांगडा शंखनाद सादर करतले. मागीर आरती आनी तिर्थप्रसाद जावन महाप्रसाद जातलो. 

सांजच्या 4 वरांचेर रांगोळी सर्त, गोड जिन्नस करपाची सर्त आनी 5 ते 9 आनी 10 ते 14 पिरायेच्या भुरग्यां खातीर भेसवर्ण सर्त आयोजीत केल्या. 7 वरांचेर सवायशिणीं वतीन दिपोत्सव, रातच्या 8.30 वरांचेर ओम सत्य साई सेवा मंडळ म्हापशें वतीन प्रार्थना आनी भजनाची कार्यावळ जातली. रातच्या 9.30 वरांचेर कलेश्वर नाट्यमंडळ नेरूळ प्रस्तूत ‘अजिंक्यतारा भाग 2’ हो नाटकाचो प्रयोग सादर करतले. 

बिरेस्तार 5 जानेवारीक श्री देव बोडगेश्वरांची 88 वी जात्रा दनपरां 12 वरांचेर गार्‍हाणें आनी आरती सयत मनयतले. उपरांत महाप्रसाद, सांजेच्या 4 वरांचेर नवदुर्गा दिंडी पंगडा वतीन दिंडीची कार्यावळ जातली. सांजेच्या 6 वरांचेर पांडुरंग राऊळ आनी वांगड्यांची भजनाची कार्यावळ, रातच्या 8.30 वरांचेर अंतरा आनी वांगडी कलाकार (महाराष्ट्र) हांची नाचाची कार्यावळ जातली. रातच्या 12 वरांचेर प्रविण कळंगुटकार दशावतारी नाट्य मंडळा वतीन ‘पुनर्जन्म’ हो नाट्यप्रयोग सादर जातलो.

 शुक्रार ता. 6 जानेवारीक सकाळच्या 10 वरांचेर श्री सत्यनारायण महापुजा, दुनपरां 1 वरांचेर महाप्रसाद, सांजेच्या 5 वरांचेर नवदुर्गा मंडळ बोरी वतीन भजनाची कार्यावळ, 7 वरांचेर नाच मार्ग ही कार्यावळ श्वेता आनी वांगडी कलाकारां (मोरजी) वतीन सादर जातलो. रातच्या 8 वरांचेर म्हापशें पालिका मर्यादीत एकोडी नाच सर्त जातली. रातच्या 11 वरांचेर श्रींची आरती आनी प्रार्थना जातली. 

शेनवार ता. 7 जानेवारीक सकाळच्या 10 वरांचेर पिकअप चालक संघटणा- म्हापशें वतीन श्री सत्यनारायण महापुजा, दनपरां 1 वरांचेर महाप्रसाद, सांजेच्या 6 वरांचेर बाल भवनाच्या विद्यार्थ्यां वतीन रंगारंग ही कार्यावळ जातली. रातच्या 8.30 वरांचेर ‘मनोमय’ ही सिध्दकला डान्स अकादमी अ‍ॅण्ड इव्हेंट्स आनी जान्हवी बोंद्रे प्रस्तूत सांस्कृतीक नाचाची कार्यावळ जातली. 

आयतार ता. 8 डिसेंबराक सकाळच्या 10 वरांचेर म्हापशें नुस्तें विक्रेत्यां वतीन श्री सत्यनारायण महापूजा. दनपरां 1 वरांचेर महाप्रसाद, सांजेच्या 6 वरांचेर लेहरे ग्रुपाची स्वराभिशेक ही संगीत कार्यावळ आनी रातच्या 8 वरांचेर आर डी एक्स क्रीव महाराष्ट्रा वतीन दिव्यशक्ती कार्यावळ जातली.

 सोमार ता. 9 डिसेंबराक सकाळीं 10 वरांचेर रिक्षा चालक संघटणवा (कदंब बस स्टॅण्ड) म्हापशें वतीन श्री सत्यनारायण महापुजा, दनपरां 1 वरांचेर महाप्रसाद, सांजेच्या 6 वरांचेर कला आनी संस्कृती संचालनालय पणजी पुरस्कृत सांस्कृतीक कार्यावळ जातली. रातच्या 8 वरांचेर ग्रुप डान्स सर्त जातली.  

 मंगळार, 10 तारखेर सकाळीं 10 वरांचेर म्हापशें नगरपालिके वतीन श्री सत्यनारायण महापुजा, दनपरां 1 वरांचेर महाप्रसाद, सांजेच्या 6 वरांचेर पं. प्रविण गांवकार आनी पल्लवी पाटील हांची भक्तीभाव ही संगीताची कार्यावळ जातली. रातच्या 8 वरांचेर दृष्टी ग्रुप महाराष्ट्रा वतीन ‘नृत्यताल’ ही नाचाची कार्यावळ जातली. 

  बुधवार 11 जानेवारीक सकाळीं 10 वरांचेर म्हापशें भाजी विक्रेत्यां वतीन श्री सत्यनारायण महापूजा, दनपरां 1 वरांचेर महाप्रसाद, सांजेच्या 6 वरांचेर संदेश खेडेकार हांची ‘स्वरसंदेश’ ही शास्त्रीय आनी उपशास्त्रीय संगीताची कार्यावळ जातली. रातच्या 8 वरांचेर महेश आनी सहकारी महाराष्ट्रा वतीन जागृती फोक आनी फ्युजन कार्यावळ जातली. 

बिरेस्तार ता. 12 जानेवारीक सांजेच्या 6 वरांचेर भजनाचा कार्यावय, रातच्या 8 वरांचेर ‘ईश्वरशक्ती’ ही सांस्कृतीक नाचाची कार्यावळ, शुक्रार ता. 13वेर सांजेच्या 5 वरांचेर भजन सर्त, शेनवार ता. 14वेर सांजेच्या 6 वरांचेर फुगडी सर्त जातली. 

आयतार ता. 15 जानेवारीक सांजेच्या 5 वरांचेर ‘सुर ईश्वर’ ही विनय महाले आनी वांगड्यांची अभंग, भक्ती, नाट्य आनी भावगीतांची कार्यावळ जातली. रातच्या 8 वरांचेर लोकनाच सर्ती उपरांत जात्रा सोंपतली. भजन, फुगडी आनी लोकनाच सर्ती खातीर नांवां नोंद करपा खातीर मंदीर कार्यालय, सागर मांगले (9764243844) हांचे कडेन संपर्क करचो असो उलो देवस्थान समितीन दिलो.