भांगरभूंय | प्रतिनिधी
भावंडांनो,
ह्या सप्तकांतले कांय दीस इतिहासाचे दाखले दितात.. त्या यादीं वरवीं आंगार कांटो हाडटात. परकी सत्ते विशीं तिडकीचे उमाळे हाडटात जाल्यार कांय दीस त्या म्हान मनशां विशीं जाणी सामान्यां खातीर आपली जीण ओंपली, नेमान सामान्य मनशां खातीर झरत रावले, जांच्या कार्या विशीं आदर निर्माण करून जिवितांत नवनिर्मिती करपा खातीर उर्बा दितात.
भावंडांनो, छत्रपती शिवाजी महाराजांच्या मरणा उपरांत तांचे पूत धर्मवीर संभाजी राजांनी हिंदवी स्वराज्याच्या राखणेचीं सुत्रां आपणाल्या हातांत घेतलीं. शिवरायांच्या मरणा उपरांत स्वराज्याची राखण करतना संभाजी राजांक साबार संकश्टाक फुडो करचो पडलो. गोंयाचेर साडेचारशीं वर्सांरवातसत्ता गाजोवपी पुर्तुगेज आनी मोगलां आड तांकां झूज दिवचें पडलें. पुर्तुगेजांनी सिद्धीक आनी मोगलांक संभाजी राजां आड मजत करपाक सुरवात केली. तेदे वेळार मराठ्यांच्या प्रांतांत मान्यताये बगर हेडपी साबार तारवांचेर संभाजी राजांनी ताबो मेळयलो. मराठा साम्राज्य पुराय तरेन सोंपोवपाक आनी संभाजी राजाक जिवेंच मारपाक औरंगजेबान तेम केल्लो. मुस्लिम धर्म आपणावन बादशहाची सेवा करची जाल्यारच जीवदान मेळटलें अशें औरंगजेबान फर्मायलें. पुणून धर्मवीर संभाजी राजा तांकां बदले ना. 22 दीस खूब हाल सोसूनय संभाजी राजा औरंगजेबा मुखार बागवलो ना. औरंगजेबान ताचे कुडीचे सामान्याक पळोवंक जावचे नात आनी सांगपाक उतरां येवची नात अशे तरेन हाल हाल केले. शेवटाक 11 मार्च 1689 दिसा औरंगजेबान धर्मवीर संभाजी राजाचो जीव घेतलो. मेल्या उपरांत लेगीत मनीसपणाक खत घालपी कृत्यां औरंगजेबान केलीं. धर्मवीर संभाजी राजाच्या चरणा कडेन नतमस्तक जावन 11 मार्चाक तांकां आमी नमळायेन वंदन करूया आं..
भावंडांनो, सातत्यान कश्ट घेयात, अभ्यास आनी आत्म बळग्याच्या नेटार साबार संशोधनां करीत आपल्या सिद्धांता वरवीं अणुबॉम, रॉकेटा खातीर संवसारांतली जायतीं गुपितां जाणीं सुटावीं केलीं, त्या म्हान विज्ञानिकाची, संशोधकांची म्हणल्यारच अल्बर्ट आयनस्टायन हांची याद आमी 14 मार्चाक काडुया.
भावंडांनो, विज्ञान हें संवसाराच्या उदरगती खातीर आसा आनी न्हय संवसाराच्या इबाडा खातीर, हो संदेश दियत पुराय संवसाराक सोबीत रितीन दवरपा खातीर अलबर्ट आयनस्टायन हाणी कितल्याश्याच शास्त्रज्ञांक पत्रां बरयलीं आनी ते खातीर खासा वावरत रावले. 1921 वर्सा पदार्थ विज्ञान शास्त्रांतल्या संशोधना खातीर तांका 4500 डॉलर्सांचो नोबेल पुरस्कार फावो जालो. आपल्या इनामांची आनी पुरस्काराची रक्कम धर्मीक संस्थानाक दान करपी, सैममोगी, पियानो वादक, गणितज्ञ आयनस्टायनाचीं 14 मार्चा जयंती मनयतात. ते निमतान तांची याद काडून आमी भावंडांनी तांकाय नमळायेन वंदन करूया आं…
आनी म्हत्वाचें म्हणल्यार, भावंडांनो, 12 मार्चाक तुमकां सगळ्या विद्यार्थी भावंडांक खूब खूब माया-मोग दिवपी, तुमचे खातीर शाळा, शिक्षणीक केंद्रां, खेळा संस्था, मैदाना तशेंच सांस्कृतीक मळ उकतें करपाक तशेंच जांचे नांवांत आयज मेरेन विद्यार्थी दीस पाळटात तें गोंय राज्याचे पयले मुख्यमंत्री सर्गेस्त भाऊसायब बांदोडकार म्हणल्यारच दयानंद बाळकृष्ण बांदोडकार हांची 12 मार्चाक जयंती राज्यात तरेकवार कार्यावळी वरवीं मनयतले. ते निमतान तांचो उगडास काडून आमी तांकां नमळायेन आर्गां ओंपूया आं..
बरें तर.. उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
