म्हादय सांबाळप गोंयकारांची नैतीक जापसालदारकी

भांगरभूंय | प्रतिनिधी

काँग्रेसः सत्तरी सावन कलश यात्रेक सुरवात; गोंयच्या सगळ्या म्हालांनी वतली यात्रा

भांगरभूंय । प्रतिनिधी

वाळपयः म्हादय न्हंयेचें अस्तित्व हें फक्त सत्तरी म्हालांत मर्यादीत उरूंक ना. पुराय गोंया खातीर तें खूब म्हत्वाचें आसा. कर्नाटक सरकाराच्या कट कारस्थानाक लागून म्हादय न्हंयेचेर निर्माण जाल्लें संकश्ट ना करतले जाल्यार गोंयकारांनी सगळे तरेचे मतभेद विसरून ह्या लढ्यांत वांटेकार जावचे. सोमारा 16 जानेवारीक विर्डी वाठारांत आयोजीत केल्ले सर्वपक्षीय सभेंत गोंयकारांनी व्हड संख्येन वांटो घेवचो, असो उलो काँग्रेस पक्षा वतीन मारला. काँग्रेस पक्षा वतीन नानोडें बांबर वाठारांत म्हादय न्हंयेदेगेर कलश यात्रेक आयतारा 15 जानेवारी सावन सुरवात जाली.

ह्या वेळार गोंयच्या वेगवेगळ्या वाठारांतल्यान व्हड प्रमाणांत काँग्रेस कार्यकर्ते हाजीर राविल्ले.

परंपरीक सांगणें करून आनी जलकलशाची पुजा करून हे यात्रेक सुरवात केली.

ह्या वेळार हळदोणें मतदारसंघाचे आमदार कार्लोस फेरेरा हांणी सांगलें, म्हादय न्हंयेच्या संरक्षणा संबंदांत कोणेच राजकारण करचें न्हय. हो लडो सगळ्यांच्या हिताचो आसा. तातूंत कसलेंच राजकारण ना. सगळ्या गोंयकारांनी म्हादय न्हंयेच्या संरक्षणाची नैतीक जापसालदारकी आपणावन ह्या लढ्यांत व्हड संख्येन वांटो घेवचो. भाजपा कार्यकर्त्यांनी लेगीत ह्या लढ्याक तेंको दिवचो, अशी विनवणी तांणी ह्या वेळार केली.

काँग्रेस पक्षान नेमान म्हादय न्हंयेच्या संरक्षणा खातीर साबार पांवड्याचेर वावर केला. आतां म्हादय न्हंयेचेर व्हड संकश्ट आयलां. जे मेरेन गोंयकार ही न्हंय सांबाळपा खातीर आक्रमकतेन फुडें सरनात ते मेरेन न्हंये वयलें संकश्ट पुराय जावचें ना. गोंयकारांक जागृत करचे खातीर कलश यात्रा सुरू केल्या. ही यात्रा गोंयच्या वेगवेगळ्या वाठारांनी भोंवून न्हंयेच्या संरक्षणा खातीर दरेकल्याक उलो मारतले, अशें आमदार फेरेरा हांणी सांगलें.

काँग्रेस पक्षान 2019 सावन हे न्हंयेच्या लढ्यांत वांटो घेतला. कर्नाटकान कट कारस्थान रचून केंद्र सरकाराच्या आशिर्वादान म्हादय न्हंयेचें उदक घुंवडावपाक परवानगी घेतल्या. ताका लागून गोंयाचेर उदकाचें संकश्ट निर्माण जालां. हे खातीर काँग्रेस पक्षान ह्या आंदोलनांत सक्रीय जावपाचो निर्णय घेतला. जे मेरेन कर्नाटकाक दिल्ली परवानगी केंद्र सरकार फाटीं घेना ते मेरेन काँग्रेस पक्ष ह्या लढ्यात अखेर मेरेन आपलें योगदान दितलो, अशें काँग्रेस प्रदेशाध्यक्ष अमीत पाटकार हांणी सांगलें.

उत्तर गोंय काँग्रेस पक्षाचे अध्यक्ष अमरनाथ पणजीकार हांणी सांगलें, गोंयांतल्या सगळ्या राजकी पक्षांनी एकवटीत जावचे. भाजपान लेगीत ह्या लढ्यांत वांटो घेवन गोंयाचेर निर्माण जाल्लें संकश्ट पयस करचे खातीर आदार करचो. गरज पडल्यार गोंय फुडारांत कर्नाटका आड पेटून उठ्ठलो, अशी शिटकावणी तांणी दिली. तशेंच दरेका कडल्यान ह्या लढ्या खातीर आदाराची आस्त उक्तायली.

ह्या वेळार वाळपय मतदारसंघ काँग्रेस गट समितीचे अध्यक्ष कृष्णा नेने, थळावी काँग्रेस फुडारी मनिषा उसगांवकार, रणजीत राणे आनी हेर मानेस्त व्हड संख्येन हाजीर राविल्ले.

धर्मीक पुजा करून यात्रेक सुरवात जाली. ह्या वेळार दरेकल्यान म्हादय न्हंयेच्या संरक्षणाचो सोपूत घेतलो आनी अखेर मेरेन म्हत्वाचें योगदान दितले, अशें जाहीर केलें.

राजकारण विरयत म्हादय लढोः पाटकार

हो लढो पुराय तरेन राजकारणा पासून पयस आसा. हया आंदोलनाक राजकी रंग दिवपाचो यत्न कोणेच करचो न्हय. उदक हो सगळ्यांचेच जिणेंतलो म्हत्वाचो घटक. ताका लागून न्हंयेचें अस्तित्व नश्ट जालें जाल्यार दरेकल्याची जीण उध्वस्थ जातली. हाका लागून फुडाराचो गंभीरपणान विचार करून दरेकल्यान ह्या लढ्याक तेंको दिवचो, अशी विनवणी तांणी केली. खासदार, आमदार, सरपंच, नगरसेवक, पंच हांणी म्हादय न्हंयेचो लढो दरेकल्याचे जिणे कडेन संबंदीत आसा, हें समजून ह्या लढ्यांत वांटो घेवचो, अशीय विनवणी काँग्रेस प्रदेशाध्यक्ष अमीत पाटकार हांणी केली.