भांगरभूंय | प्रतिनिधी
म्हादयचेर सर्वोच्च न्यायालयांत फाल्यां सुनावणी
पणजी : म्हादयच्या पात्रांत 188 टीएमसी उदक आशिल्ल्याचें म्हादय लवादान निवाड्यात म्हणलां. ह्या उदकाच्या प्रमाणाक गोंयचो आक्षेप आसा. फाल्यां सर्वोच्च न्यायालयांत सुनावणी वेळार हो मुखेल मुद्दो आसतलो, अशें अॅडव्होकेट जनरल देवीदास पांगम हांणी सांगलें.
म्हादय संबंधी गोंय सरकाराची खास याचिका (एसएलपी) आनी हेर याचिकांचेर सर्वोच्च न्यायालयात फाल्यां बुधवारा सुनावणी जातली. लवादान म्हादयच्या पात्रात आशिल्ल्या उदकाचें जें प्रमाण थारायलां, तें आमकां मान्य ना, अशें श्री. पांगम हांणी सांगलें. म्हादय लवादाच्या निवाड्याक गोंय सरकारान आव्हान दिलां. ते भायर गोंय सरकारच्यो हेर काय अंतरीम मागण्यो आसा. गोंयच्या राना जीव मुखेल संरक्षकान (वायल्ड लायफ वॉर्डन) कर्नाटकाक नोटीस जारी करून काम बंद करपाचो जो आदेश दिला, ताका कर्नाटकान सर्वोच्च न्यायालयात आव्हान दिलां. हो एक मुद्दो आसतलो, अशें श्री. पांगम हांणी सांगलें.
म्हादय संबंदी गोंयच्या याचिकेचेर 29 नोव्हेंबराक सुनावणी जावपाची आशिल्ली. ती जावंक ना. फाल्या 6 डिसेंबराक सुनावणेच्या वळेरीत म्हादय याचिकेचो आस्पाव आसा.
म्हादय खटल्या संबंदी गोंयची बाजू घटमुट आसा. गोंय सरकार खटलो जिखतलो, असो विस्वास मुखयमंत्री डॉ. प्रमोद सावंत हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
