भांगरभूंय | प्रतिनिधी
सांखळी पालिका मुख्याधिकाऱ्यान केली नोटीस जारी
भांगरभूंय I प्रतिनिधी
पणजी : म्हादयच्या जागृताये खातीर विरोधी पक्ष, बिगर सरकारी संघटना तशेंच कार्यकर्त्यांनी सांखळे आयोजीत केल्ले जाहीर सभेची परवानगी सांखळी पालिकेन रद्द केल्या. ही सभा 16 जानेवारीक सांजे जावपाची आशिल्ली. सोमारच्या सप्तकी बाजाराचें कारण दीवन परवानगी रद्द केल्ल्याची नोटीस सांखळेच्या मुख्याधिकाऱ्यांनी जारी केल्या.
हो विचार स्वातंत्र्याचेर घालो आशिल्ल्याची टिका विरोधी पक्ष फुडारी युरी आलेमांव आनी गोवा फॉरवर्डाचे अध्यक्ष विजय सरदेसाय हांणी केल्या.
म्हादय प्रस्नाचेर राजकी पक्ष तशेंच बिगर सरकारी संघटणा सक्रीय जाल्या. शेनवारा रिव्होलुशनरी गोवन्स पक्षाची पणजे जाहीर सभा जाली. तशेंच माशेलांत सभा जाली. म्हादयच्या उदका खातीर जागृताये सयत आंदोलनां सुरू जाल्यात. हेच मोहिमेचो भाग म्हूण सोमारा 16 तारखेक सांखळे पालिका मैदानाचेर सभा आयोजीत केल्ली. मुख्यमंत्री डॉ. प्रमोद सावंत हांच्या सांखळी मतदारसंघांत ही सभा जावपाची आसली. काँग्रेस सयत हेर विरोधी पक्षांचो ह्या सभेक तेंको आसलो. म्हादयचें उदक वाटावपा खातीर जण एकल्यान सादूर रावपाक जाय. म्हादयचें उदक घुंवडायलें जाल्यार राज्याच्या पर्यावरणाचेर विपरीत परिणाम जातलो. लोकां मदीं जागृताय करपाचो हेत सभे फाटल्यान आसलो.
ही सभा सोमारा पालिका मैदानाचेर जावपाची आसली. सांखळी पालिकेने पयलीं सभेक परवानगी दिल्ली. आतां सप्तकी बाजाराचें कारण दीवन परवानगी फाटीं घेतल्या. मैदानाचे कुशीक बाजार भरता. बाजारा दिसा सभा जाली जाल्यार येरादारीची कोयंडी जातली. हाका लागून सभेक परवानगी दिवप शक्य जावचे ना. दिल्ली परवानगी रद्द करता, अशी नोटीस सांखळी पालिकेन जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
